BAKI, AzerVoice, Nailə Babazadə

Livan Sosial İşlər naziri Hanin əs-Seyyid bildirib ki, ilin sonuna qədər ölkəsinə könüllü şəkildə qayıdan suriyalı qaçqınların sayının yarım milyona çatacağı gözlənilir.

AzerVoice xəbər verir ki, Livanın rəsmi xəbər agentliyi NNA-nın məlumatına görə, nazir Seyyid, Livan hökumətinin suriyalı qaçqınların könüllü şəkildə öz ölkələrinə qayıdışını təmin etmək üçün hazırladığı plan çərçivəsində evlərinə dönmək üçün yola çıxan bir qrup suriyalıya müşayiət edib.

Bekaa bölgəsinə bağlı Zahle qəsəbəsində açıqlama verən Seyyid bildirib ki, hökumətin sözügedən planı Livan Ümumi Təhlükəsizlik İdarəsi, BMT Qaçqınlar üzrə Ali Komissarlığı (UNHCR) və BMT-nin Beynəlxalq Miqrasiya Təşkilatı (IOM) ilə əməkdaşlıq çərçivəsində həyata keçirilir.

Nazir qeyd edib ki, indiyədək 320 mindən çox suriyalı öz ölkəsinə könüllü şəkildə qayıdıb və bu rəqəmin ilin sonuna qədər yarım milyona çatacağı gözlənilir.

Qeyd edək ki, Livanın suriyalı qaçqınların könüllü və nizamlı şəkildə geri dönməsini nəzərdə tutan planının ilk mərhələsi 29 iyul 2024-cü ildə başlayıb. Həmin gün 72 suriyalı qaçqın Livan Daxili Təhlükəsizlik Baş İdarəsi və Suriya hökuməti arasında koordinasiya ilə əl-Məsna sərhəd qapısından ölkələrinə keçiblər.

Livanda yaşayan suriyalı qaçqınların sayının 1,8 milyon olduğu təxmin edilir. Onların təxminən 880 mini UNHCR-də qeydiyyatdan keçib.

Digər tərəfdən, Suriyada Əsəd rejiminin 8 dekabr 2024-cü ildə süqutundan sonra, vətəndaş müharibəsi illərində qonşu ölkələrə sığınmış suriyalıların öz vətənlərinə qayıdışı sürətlənib.