BAKI, AzerVoice, Nailə Babazadə

Qəzzadakı hökumət, İsrailin iki il ərzində həyata keçirdiyi intensiv hava və quru hücumlarının bölgəni “ən böyük humanitar fəlakət”lə üz-üzə qoyduğunu açıqlayıb.

AzerVoice xəbər verir ki, hökumətin Media Ofisinin məlumatına görə, İsrailin hücumları nəticəsində Qəzza zolağında 70 milyon tonadək dağıntı qalıb. Açıqlamada həmçinin bölgədə 20 min partlamamış sursatın təhlükə yaratdığı və onların zərərsizləşdirilməsi üçün xüsusi təlim keçmiş beynəlxalq ekspert qruplarına ehtiyac olduğu vurğulanıb.

Bəyanatda bildirilib ki, İsrailin iki ildən artıq davam edən hücumları nəticəsində Qəzza son onilliklərin ən ağır dağıntıları ilə üzləşib:

“Hökumətin 15 oktyabr tarixinə qədər əldə etdiyi məlumatlara görə, Qəzza zolağında 65–70 milyon ton arası dağıntı qalıb. Bu dağıntı İsrailin birbaşa hədəfə alaraq məhv etdiyi minlərlə ev, müəssisə və infrastruktur obyektlərindən ibarətdir. Qəzza indi tikinti və ekoloji baxımdan tamamilə fəlakət zonasına çevrilib.”

Açıqlamada həmçinin bildirilib ki, enkazların təmizlənməsi işləri də ciddi çətinliklərlə üzləşəcək, çünki İsrailin yaratdığı maneələr səbəbindən ağır texnika və xüsusi avadanlıqların bölgəyə daxil olmasına icazə verilmir. Tel-Əviv administrasiyasının sərhəd qapılarını bağlı saxladığı və dağıntılar altındakı cəsədlərə çatmaq üçün zəruri avadanlıqların girişinə də icazə vermədiyi qeyd olunub.

Xatırladaq ki, ABŞ Prezidenti Donald Tramp 9 oktyabrda Misirdə aparılan danışıqlarda İsrail və HƏMAS arasında atəşkəs planının ilk mərhələsinin razılaşdırıldığını açıqlamışdı. Razılaşma İsrail hökumətinin təsdiqi ilə 10 oktyabrda qüvvəyə minib və həmin gün saat 12:00-dan etibarən Qəzza zolağında atəşkəs elan olunub.

Rəsmi məlumatlara əsasən, İsrailin iki il davam edən hücumları nəticəsində 67 min 967 fələstinli həlak olub, 170 min 179 nəfər isə yaralanıb.