BAKI,AzerVoice
Səudiyyə Ərəbistanı Nazirlər Şurası çərşənbə axşamı keçirilən iclasda ABŞ Prezidenti Donald Tramp administrasiyasının Qəzzadakı müharibəni dayandırmaq, bölgəni yenidən qurmaq və humanitar yardımların maneəsiz daxil olmasını təmin edən sülh planını müsbət qarşıladığını açıqlayıb.
AzerVoice xəbər verir ki,Riyadda vəliəhd şahzadə, Baş nazir Məhəmməd bin Salman sədrliyi ilə keçirilən iclasda krallığın ABŞ-la əməkdaşlığa hazır olduğu vurğulanıb. Məqsəd,İsrailin Qəzzadan tam çıxışı, kifayət qədər humanitar yardımın təmin edilməsi və “iki dövlətli həll” əsasında 1967-ci sərhədləri daxilində, paytaxtı Şərqi Qüds olan müstəqil Fələstin dövlətinin yaradılmasına nail olmaqdır.
Nazirlər Şurası həmçinin Səudiyyə nümayəndə heyətinin BMT Baş Assambleyasının 80-ci sessiyasında və digər beynəlxalq görüşlərdə fəal iştirakını yüksək qiymətləndirib. Qeyd olunub ki, bu, krallığın beynəlxalq siyasətdə mərkəzi rolunu və sülh, ədalət, dialoq prinsiplərinə bağlılığını nümayiş etdirir.
Şura bəyan edib ki, Səudiyyənin diplomatik səyləri nəticəsində Fələstin dövlətini tanıyan ölkələrin sayı artmaqdadır. Bu isə fələstinlilərin öz müqəddəratını təyin etmək haqqını möhkəmləndirən beynəlxalq iradənin gücləndiyini göstərir.
Nazirlər Şurası Pakistan Baş naziri Məhəmməd Şahbaz Şərifin son səfərinin nəticələrini də yüksək dəyərləndirib. Səfər çərçivəsində imzalanmış “Birgə Strateji Müdafiə” sazişi iki ölkə arasında hərbi əməkdaşlığı dərinləşdirməyi, bölgədə və dünyada sülh və təhlükəsizliyi möhkəmləndirməyi hədəfləyir.
İclasda vəliəhd şahzadə ölkənin 95-ci milli günü münasibətilə dəstək və təbrik ünvanlayan dost və qardaş ölkələrin liderlərinə təşəkkür edib.
Nazirlər Şurası Səudiyyənin Beynəlxalq Atom Enerjisi Agentliyi İdarəçilər Şurasına üzv seçilməsini, eləcə də ICAO-Beynəlxalq Mülki Aviasiya Təşkilatına 175 səslə üzv seçilməsini ölkənin beynəlxalq nüfuzuna göstərilən etimad kimi qiymətləndirib.
Həmçinin, İmam Turki bin Abdullah Kral Qoruğunun UNESCO-nun “İnsan və biosfer” proqramına qəbul edilməsi krallığın ekoloji müxtəlifliyin qorunması və davamlı inkişaf siyasətinə sadiqliyinin göstəricisi kimi qeyd olunub.