BAKI, AzerVoice, Nailə Babazadə

Yəməndəki “Ənsar Allah” hərəkatı (husilər), Eylat, Ramon Hava Limanı və işğal altındakı Qüds bölgələrindəki “həssas və həyati” hədəflərə qarşı uğurlu hərbi əməliyyatlar həyata keçirdiklərini açıqlayıblar.

AzerVoice xəbər verir ki, İranın dəstəklədiyi Yəmən husilərinin hərbi sözçüsü Yahya Səri ABŞ mərkəzli X sosial media platformasındakı hesabında və televiziyada yayımlanan açıqlamasında məsələ ilə bağlı məlumat verib.

Sözcü Səri bildirib ki, husilərə bağlı silahlı qüvvələrin raket qüvvələri işğal altındakı Qüds ətrafındakı həssas hədəfləri vurmaq üçün çoxsaylı döyüş başlıqlarına malik olan “Fələstin 2” adlı hipersəs ballistik raketi ilə hərbi əməliyyat həyata keçirib.

“Əməliyyat uğurla məqsədinə çatdı və milyonlarla işğalçı sionist dəstəsinin sığınacaqlara qaçmasına səbəb oldu.” - deyə Səri qeyd edib.

O, həmçinin İsrailin cənubundakı Umm ər-Rəşraş (Eylat) bölgəsində yerləşən Ramon Hava Limanı və iki həyati hədəfə qarşı 3 pilotsuz uçuş aparatı (PUA) ilə uğurlu hərbi əməliyyat keçirdiklərini də əlavə edib.

Səri bildirib ki, bu hücumlar İsrailin Qəzzada fələstinlilərə qarşı törətdiyi soyqırım və aclıq cinayətlərinə, həmçinin Yəmənə etdiyi hücumlara cavab olaraq həyata keçirilib. O qeyd edib ki, Qəzzaya qarşı hücumlar dayandırılmayana və blokada aradan qaldırılmayana qədər İsrailə qarşı əməliyyatlar davam etdiriləcək.

Qeyd edək ki, İsrail ordusu isə dünən Qətərdəki Həmas danışıqlar heyətinə edilən hücumdan bir neçə saat sonra Yəməndən atılan bir ballistik raketin hava hücumundan müdafiə sistemləri tərəfindən vurulduğunu açıqlayıb.

İsrail mediası isə xəbər verir ki, Təl-Əviv rəhbərliyi 18 martda Qəzzada atəşkəs razılaşmasını pozaraq hücumlara yenidən başladıqdan bu yana husilər ümumilikdə 81 ballistik raket və 35 pilotsuz uçuş aparatı atıblar.