BAKI,VOA,Yusif Şərifzadə

Yəmənin beynəlxalq səviyyədə tanınan hökuməti Səna hava limanına endirilən zərbədən sonra qarşıdurmanın daha geniş miqyas almasına imkan verilməməli olduğunu bildirib. Rəsmi Səna İranın Yəmənə münaqişələrə cəlb edilməsinə qarşı olduqlarını açıqlayıb.

VOA xəbər verir ki, Yəmənin beynəlxalq səviyyədə tanınan hökuməti husilərin nəzarətində olan Səna hava limanına hücumun İran təyyarəsinin enişinin qarşısını almaq məqsədilə həyata keçirildiyini bildirib.

Yəmən Prezident Rəhbərlik Şurasının sədri Rəşad əl-Əlimi açıqlamasında qarşıdurmanın əhatə dairəsinin genişləndirilməməsi barədə göstəriş verdiyini qeyd edib. O bildirib ki, məqsəd İranın Yəməni öz maraqlarına xidmət edən müharibələrə cəlb etməsinin qarşısını almaqdır.

Rəşad əl-Əlimi gələcəkdə heç bir təyyarənin, istər Səna hava limanı, istərsə də digər hava limanları vasitəsilə Yəmənin hava məkanını pozmasına icazə verməyəcəklərini vurğulayıb.

İranla müttəfiq olan husilər isə hücuma görə Səudiyyə Ərəbistanını günahlandırıblar. Lakin Səudiyyə Ərəbistanının hadisədə iştirakına dair rəsmi təsdiqlənmiş məlumat verilməyib.

Səna hava limanı ətrafında yaranan gərginlik Yəməndə uzun müddətdir davam edən siyasi və hərbi qarşıdurmanın yeni mərhələsi kimi qiymətləndirilir. Beynəlxalq müşahidəçilər tərəfləri vəziyyətin daha da kəskinləşməsinin qarşısını almağa çağırırlar.