BAKI, AzerVoice, Səməd Əyyubov
Qətər Daxili İşlər Nazirliyi İsrailin Dohadakı HƏMAS rəhbərlərinə qarşı həyata keçirdiyi hücumdan sonra hadisələrin gedişatını diqqətlə izlədiyini və bütün zəruri tədbirləri gördüyünü bildirib.
AzerVoice xəbər verir ki, bu barədə nazirliyin verdiyi açıqlamada qeyd olunur.
“Səlahiyyətli orqanlar hədəf bölgəni araşdırmaqda və təhlükəsizliyi təmin etməkdə davam edir. Daxili İşlər Nazirliyi daxili təhlükəsizlik qüvvələri ilə birlikdə hadisələrin gedişatını diqqətlə izləyir və vətəndaşların, eləcə də sakinlərin təhlükəsizliyini təmin etmək üçün bütün lazımi tədbirləri görür” - deyə, açıqlamada vurğulanıb.
Qeyd edək ki, “Əl-Cəzirə” telekanalının HƏMAS-dakı mənbələrə istinadən verdiyi məlumata görə, Xəlil əl-Həyyənin başçılıq etdiyi nümayəndə heyəti İsrailin Dohaya təşkil etdiyi sui-qəsd cəhdindən xilas olub. Məlumata görə, hücum zamanı HƏMAS-ın atəşkəs üzrə danışıqlar aparan heyəti iclasda olub. Bildirilib ki, nümayəndə heyəti ABŞ prezidenti Donald Trampın Qəzzada atəşkəs üçün təqdim etdiyi təklifi müzakirə edərkən hədəfə alınıb.