BAKI, AzerVoice, Nailə Babazadə
İsrail ordusunun bu gün səhər saatlarından etibarən Qəzza zolağının müxtəlif bölgələrinə həyata keçirdiyi hücumlar nəticəsində azı 20 fələstinli həyatını itirib. Ölənlər arasında qadınlar və uşaqlar da var.
AzerVoice xəbər verir ki, xəstəxana mənbələri və şahidlərinin məlumatına görə, İsrail ordusu Qəzza şəhərinin şimalı ilə yanaşı, cənub, mərkəz və digər bölgələrdəki yaşayış evlərini, aşevlərini, çadırları və yardım gözləyən insanları hədəf alıb.
Qəzza şəhərinin cənubunda yerləşən Tel əl-Heva məhəlləsindəki Əbu Mazin döngəsi yaxınlığında məcburi köçkünlərin yaşadığı çadırlara edilən hücum nəticəsində 3-ü uşaq, 1-i qadın olmaqla 5 nəfər həlak olub. Saldırının ardından çadırda yanğın baş verib.
Refah şəhərində İsrail əsgərlərinin açdığı atəş nəticəsində yardım gözləyən 3 fələstinli həyatını itirib.
Qəzzanın mərkəzindəki Nuseyrat qaçqın düşərgəsində isə bir ailənin yaşadığı çadırın hədəf alındığı hücumda eyni ailədən 7 nəfər, o cümlədən 4 uşaq həlak olub.
Sabra məhəlləsində bir evə endirilən hava zərbəsi nəticəsində 3 fələstinli həyatını itirib, bir neçə nəfər yaralanıb. Görgü şahidlərinə görə, evin dağıntıları altında qalan insanlar hələ də çıxarılmayıb.
Derec məhəlləsində daha bir evin bombalanması nəticəsində 1 fələstinli ölüb.
Nasr məhəlləsindəki İtalyan Qülləsi ətrafında yerləşən sığınacaq çadırları isə İsrailə məxsus dronların hücumuna məruz qalıb.
Qəzzanın şimalında yerləşən Şeyx Rıdvan bölgəsinin şərq hissəsində İsrail ordusu top atəşləri və partlayıcı yüklü hərbi texnikalarla genişmiqyaslı dağıntı əməliyyatı həyata keçirib.
Deyr əl-Bəlah şəhərinin şərqindəki Kisufim bölgəsində isə yardım növbəsində olan fələstinlilərə açılan atəş nəticəsində 1 nəfər həyatını itirib.