BAKI, AzerVoice, Səməd Əyyubov
Səudiyyə Ərəbistanının xarici işlər naziri şahzadə Feysəl bin Fərhan Fransa, Misir, Almaniya və Türkiyənin xarici işlər nazirləri, eləcə də Avropa İttifaqının (Aİ) xarici siyasət və təhlükəsizlik məsələləri üzrə ali nümayəndəsi Kaya Kallasla Qəzza zolağındakı vəziyyəti müzakirə edib.
AzerVoice xəbər verir ki, Feysəl bin Fərhan fransalı həmkarı Jan Noel Barro, misirli həmkarı Bədr Əbdül-Ati, almaniyalı həmkarı Yohan Vadeful, türkiyəli həmkarı Hakan Fidan və avropalı nümayəndə Kaya Kallasla ayrı-ayrılıqda telefon danışıqları aparıb.
Söhbət zamanı İsrailin hücumları və insan haqları pozuntularının dayandırılmasının, həmçinin Qəzza sakinlərinin üzləşdiyi humanitar fəlakətin aradan qaldırılmasının vacibliyi vurğulanıb.
Tərəflər bölgədə təhlükəsizlik və humanitar vəziyyətin pisləşməsinin qarşısını almaq üçün beynəlxalq səylərin gücləndirilməsinin zəruriliyini də müzakirə ediblər.
Qeyd edək ki, İsrail Təhlükəsizlik Kabineti ötən gün Qəzza şəhərinin işğalı ilə bağlı yeni planı təsdiqləyib. Bu qərar bölgədə gərginliyi daha da artırıb və beynəlxalq aləmdə, o cümlədən Türkiyə və Almaniyada kəskin reaksiyalara səbəb olub.