BAKI, AzerVoice, Səməd Əyyubov
Hizbullah, silahlarını təhvil vermək üçün hər hansı bir vaxt cədvəli müəyyən edilməsinə qarşı çıxdığını açıqlayıb.
AzerVoice xəbər verir ki, bu barədə Hizbullahın baş katibi Naim Qasim bildirib.
O qeyd edib ki, İsrailin Livana qarşı hücumları davam etdiyi müddətdə partiya silahlarını təhvil vermək üçün heç bir cədvəli qəbul etməyəcək.
“İsrailin təcavüzü altında icra olunacaq hər hansı vaxt cədvəlini qəbul edə bilmərik” - deyə, Qasim bildirib. O, silahların təhvil verilməsi əvəzinə ölkənin təhlükəsizlik strategiyasının müzakirə edilməsinə çağırıb.
Qasim həmçinin dövlətə müraciət edərək təzyiqlər və hədələr qarşısında müdafiə və qorunma planları hazırlamağı tələb edib və müqaviməti gücsüzləşdirmək əvəzinə ona dəstək verməyin zəruriliyini vurğulayıb.
O, eyni zamanda, Livan və İsrail arasında ötən ilin noyabrında ABŞ vasitəçiliyi ilə əldə edilən atəşkəs razılaşmasına istinad edərək, Hizbullahın heç bir yeni razılaşmaya imza atmadığını bildirib. Qasim xəbərdarlıq edib ki, "əgər İsrail Livana qarşı yeni müharibəyə başlasa, İsrail ərazisinə raketlər yağacaq".
Qeyd edək ki, bu açıqlamalar, Livan prezidenti Cozef Aunun sədrliyi ilə keçirilən iclas fonunda səslənib. İclasın əsas mövzularından biri, dövlətin bütün ərazilərində tam suverenliyini təmin etmək və silahın yalnız dövlətin nəzarətində olmasına dair qərarların icrası olub. Həmçinin, noyabrın 27-də Hizbullah ilə İsrail arasında atəşkəsin tətbiqi ilə bağlı məsələlər də müzakirə olunub.
Adını açıqlamayan Livanlı bir mənbə AFP agentliyinə verdiyi açıqlamada bildirib ki, Vaşinqton Hizbullahın silahlarını müəyyən edilmiş vaxt çərçivəsində təhvil verməsi üçün Beyruta təzyiq göstərir. ABŞ-ın xüsusi nümayəndəsi Tomas Barrak isə Livan hökumətini “silahın yalnız dövlətin əlində olmasına dair öhdəliklərini dərhal yerinə yetirməyə” çağırmışdı.
Hizbullah ötən il İsraillə apardığı uzunmüddətli qarşıdurmadan ciddi itkilərlə çıxıb. Döyüşlər zamanı təşkilatın çoxsaylı komandirləri həlak olub, arsenalının böyük hissəsi məhv edilib. Bu, həm də Hizbullahın Livandakı təsirinin azalmasına səbəb olub.
Həmçinin qeyd edək ki, Livanda 1975–1990-cı illərdə baş verən vətəndaş müharibəsindən sonra bütün silahlı qruplar silahlarını təhvil versə də, Hizbullah hərbi arsenalını saxlayan yeganə təşkilat olaraq qalır. Bu məsələ, dərin dini və siyasi bölünmələrin mövcud olduğu Livanda ən mübahisəli mövzulardan biri sayılır.