BAKI, AzerVoice, Zeynəb Raminqızı

Demokrat konqresmenlər ABŞ administrasiyasından Fələstini tanımağı tələb edib.

AzerVoice xəbər verir ki, ABŞ Konqresinin Nümayəndələr Palatasının 13 Demokrat üzvü Prezident Donald Tramp administrasiyasına ünvanladıqları məktubda Fələstin Dövlətini tanımağa çağırıb.

Bu çağırışla ABŞ administrasiyasını beynəlxalq ictimaiyyətin mövqeyinə uyğun mövqe tutmağa dəvət ediblər.

Məktubda “bu faciəvi dövr fələstinlilərin öz müqəddəratını təyinetmə hüququnun tanınması ilə bağlı çoxdankı ehtiyacı dünyanın diqqətinə çatdırıb”- deyə qeyd olunub.

Ro Khanna rəhbərliyində göndərilən müraciəti imzalayan Demokratlar arasında Çelli Pinqri, Nydia Velazkes, Cim MakQovern, Veronika Eskobar, Al Qrin, Bonni Uotson-Karson və digər konqresmenlər də yer alıb.

Eyni zamanda, nümayəndə Al Qrin Fələstin Dövlətinin tanınması ilə bağlı rəsmi qətnamə təqdim etməyə hazırlaşdığını açıqlayıb. Digər konqres üzvləri isə yaxın həftələrdə Qəzzada dərinləşən humanitar böhranla bağlı təşəbbüslərlə çıxış etməyi planlaşdırırlar.

Qeyd edək ki, hazırda BMT-yə üzv olan 193 ölkədən 147-si Fələstini tanıyır. Bu ölkələrə tezliklə Fransa, Böyük Britaniya, Malta və Kanada da qoşulacaq. Fransa prezidenti Emmanuel Makron, ölkəsinin sentyabr ayında Fələstin Dövlətini rəsmən tanıyacağını bəyan edib. Eyni açıqlamalar Kanada baş naziri və Malta hökuməti tərəfindən də verilib.

Ekspertlərin fikrincə, Avropa ölkələrinin bu istiqamətdə atdığı addımlar, İsrail-Fələstin siyasətində yeni mərhələnin başlaya biləcəyini göstərir.