BAKI,AzerVoice
Suriyadakı ərəb tayfaları cümə axşamı ölkənin cənubunda yerləşən Süveyda vilayətində yaşayan bədəvi tayfalarına dəstək məqsədilə ümumi səfərbərlik elan ediblər.
AzerVoice xəbər verir ki, bu haqda Suriya ərəb yatfaları birliyinin yaydığı bəyanatda deyilir.
“Biz Suriya tayfalarının övladları olaraq, Süveyda vilayətində bədəvi tayfalarına qarşı Hicri milislərinin həyata keçirdiyi qətliam və soyqırımları, həmçinin dinc əhalinin kütləvi şəkildə köçürülməsi və didərgin salınmasından dərin narahatlıq duyuruq. Əxlaqi və tayfa borcumuzdan irəli gələrək Suriya hökumətindən bölgəyə kənardan gələn və bədəvi tayfalarına yardım məqsədilə hərəkətə keçən döyüşçülərə mane olmamağı və müdaxilə etməməyi tələb edirik. Onlar qadınlara, uşaqlara və yaşlılara qarşı edilən zorakılığa qarşı haqlı mübarizə aparırlar.Bu döyüşçülərə qarşı atılacaq hər hansı addım cinayətkarları açıq şəkildə dəstəkləmək deməkdir və bu addımların arxasında dayananlar tarixi və əxlaqi məsuliyyət daşıyacaq. Suriya tayfaları öz övladlarının arxasında yekdil şəkildə dayanır və onlara qarşı ediləcək hər hansı təcavüz qəti və birlik içində cavablandırılacaq.”-bəyanatda deyilir.
Tayfa döyüşçüləri artıq Süveyda şəhərinə doğru hücuma keçərək bir neçə kənd və qəsəbəyə, xüsusən də Məzrəa qəsəbəsinə nəzarəti ələ alıblar. Onlar hazırda şəhərin şimalından – Dəməşq yolu istiqamətindən Süveydaya yaxınlaşırlar.
Hücumda iştirak edən döyüşçülərin sayı 50 min nəfəri keçib və bu sayın cümə günü səhər saatlarında Şərqi Suriya, Hələb və ətraf bölgələrdən gələn yeni qüvvələrlə daha da artması gözlənilir.
Hazırda döyüşlərdə 41 tayfa və qəbilə iştirak edir, bu tayfalar Suriyanın əhalisinin 70 faizindən çoxunu təşkil edir. İraq, İordaniya və Livandakı ərəb tayfaları da Suriya tayfalarının çağırışına cavab olaraq Süveydaya getmək üçün hazırlıqlara başlayıblar. Suriya tayfaları bu məsələ ilə bağlı İordaniya kralı II Abdullah və İraqın Ənbar bölgəsindəki tayfa liderlərinə müraciət ediblər.
Separatçı Şeyx Hikmət əl-Hicrinin tərəfdarlarının hücumu zamanı 100-dən çox insan öldürülüb, on minlərlə insan yaşadığı kəndləri tərk etməyə məcbur olub və yüzlərlə ev yandırılıb.