Suriyanın keçmiş vitse-prezidenti Əbdülhəlim Xəddamın sentyabrda nəşr olunacaq xatirələrində ölkənin 12 milyard dollarlıq dövlət ehtiyatının keçmiş prezident Hafiz Əsədin şəxsi adına rəsmiləşdirildiyi iddia edilir.

Xəddamın sözlərinə görə, sözügedən məbləğ dövlətə məxsus olsa da, xaricdə Əsədin adına açılmış hesabda saxlanılıb. O, bu vəziyyətin sonradan 65 milyon dollarlıq şübhəli pul köçürməsi ilə bağlı daxili böhrana səbəb olduğunu yazıb.

Xəddamın versiyasına əsasən, Əsəd xaricdəki hesabından 65 milyon dolların çıxarılması barədə məlumat aldıqdan sonra bankdan köçürmə sənədini tələb edib. Sənəddəki imzanın saxta olduğu müəyyənləşdirilib. Pulun keçmiş baş nazir Mahmud əl-Züəbiyə bağlı hesaba köçürüldüyü üzə çıxıb və vəsaitin geri qaytarılması tələb olunub.

Xəddam xatirələrində Züəbini korrupsiya fəaliyyətində iştirak etməkdə ittiham edib və onun uzun müddət dövlət idarəçiliyində mühüm mövqedə olduğunu qeyd edib.

Məlumata görə, 2000-ci ilin mayında Hafiz Əsəd Züəbini xəyanətdə ittiham edərək onun araşdırılmasını və məsuliyyətə cəlb edilməsini istəyib. Züəbi istintaqa çağırılacağını öyrəndikdən sonra intihar edəcəyini bildirib və həmin ayın 24-də evində özünü güllələyib.

Xəddam həmçinin Züəbinin dövründə “Airbus” təyyarələrinin alınması ilə bağlı müqavilə ətrafında korrupsiya iddialarının olduğunu yazıb.

Qeyd edək ki, xatirələrdəki bank sənədləri və maliyyə iddiaları müstəqil şəkildə təsdiqlənməyib. Hadisələrin təfərrüatları Xəddamın sentyabrda nəşr ediləcək xatirələrində təqdim olunur.