BAKI, AzerVoice
HƏMAS tərəfindən Qətərin Qəzza ilə bağlı təqdim etdiyi nizamlama təklifinə edilən dəyişikliklər İsrail üçün qəbuledilməzdir.
AzerVoice xəbər verir ki, bu barədə İsrailin Baş naziri Benyamin Netanyahunun ofisi bəyanat yayıb.
“HƏMAS-ın Qətərin təklifinə etdiyi düzəlişlər bizə (İsrailə – red.) təqdim olunub və bunlar İsrail üçün qəbuledilməzdir” - deyə, bəyanatda qeyd olunub.
Baş nazirin ofisi əlavə edib ki, Netanyahu dolayı danışıqlara dəvətə cavab verilməsini və Qətərin girovların geri qaytarılması ilə bağlı təşəbbüsü əsasında danışıqların davam etdirilməsini tapşırıb. Bu çərçivədə İsrail nümayəndə heyəti iyulun 6-da Qətərdə keçiriləcək görüşdə iştirak etmək üçün yola düşəcək.
Hökumət ofisi qeyd edib ki, İsrail artıq Qətərin təşəbbüsünü qəbul edib. Ofisdən verilən məlumata görə, Baş nazir bu qərarı “mövcud vəziyyətin qiymətləndirilməsi fonunda” nümayəndə heyətinin Qətərə göndərilməsi məqsədilə qəbul edib.