BAKI,VOA,Yusif Şərifzadə

Livan prezidenti Cozef Aun ölkənin cənubunda fəaliyyət göstərən BMT qüvvələrinin mandatının uzadılmasını dəstəkləyib.

VOA xəbər verir ki, Cozef Aun parlament təşəbbüsünü və beynəlxalq qüvvələrin Cənubi Livandakı fəaliyyət müddətinin uzadılmasını tələb edən müraciəti müsbət qarşılayıb.

Livan prezidenti bildirib ki, BMT qüvvələrinin ölkənin cənubunda mövcudluğu bir sıra səbəblərə görə mühüm əhəmiyyət daşıyır.

Onun sözlərinə görə, beynəlxalq qüvvələrin bölgədə fəaliyyəti əhalinin kənd və şəhərlərində sabitliyin qorunmasına, həmçinin Livan ordusu ilə əməkdaşlıq və koordinasiya şəraitində təhlükəsizliyin gücləndirilməsinə kömək edir.

Aun qeyd edib ki, Livanın əsas seçimi BMT qüvvələrinin mandatının uzadılmasıdır.

O bildirib ki, mandat uzadılmasa, ikinci variant kimi beynəlxalq qüvvələrin Cənubi Livanda fəaliyyətini davam etdirməsinə imkan verən və hüquqi çərçivəyə uyğun olan mexanizm qəbul edilməlidir.

Prezidentin sözlərinə görə, beynəlxalq qüvvələr Livan ordusunun yanında fəaliyyət göstərməli və onunla koordinasiyada çalışaraq sabitliyin qorunmasına və üzərlərinə qoyulan vəzifələrin yerinə yetirilməsinə dəstək verməlidir.

Aun İsrailin BMT qüvvələrinin Livandakı mövcudluğuna qarşı çıxdığını və onların bölgədən çıxarılması üçün təxminən bir ildir təzyiq göstərdiyini bildirib. O əlavə edib ki, Livan isə beynəlxalq qüvvələrin ölkənin cənubunda fəaliyyətini davam etdirməsini istəyir.