Azərbaycan və Özbəkistan arasında IV Regionlararası Forum çərçivəsində yeni əməkdaşlıq sənədləri imzalanıb. Bu barədə iqtisadiyyat naziri Mikayıl Cabbarov məlumat verib. Sənədlər energetika, maliyyə, infrastruktur, tikinti və istehsal kimi prioritet sahələri əhatə edir. Məqsəd iki ölkə arasında iqtisadi əlaqələri daha da şaxələndirməkdir. Yeni razılaşmalar işgüzar birliklər arasında birbaşa əlaqələrin gücləndirilməsinə xidmət edəcək. Özəl sektorun potensialından daha geniş istifadə olunması əsas hədəflərdən biri kimi göstərilir. Tərəflər yeni birgə layihələrin həyata keçirilməsini də planlaşdırırlar. Forumun nəticələrinin Azərbaycan–Özbəkistan iqtisadi tərəfdaşlığının daha da inkişafına təkan verəcəyi gözlənilir.

Bəsic qüvvələrinin rəhbəri Hüseyn Taib qlobal güc balansının dəyişdiyini bildirib. O, ABŞ və İsrailin hazırda ən zəif mövqelərindən birində olduğunu iddia edib. Taib ABŞ-nin artıq dünyanın, İsrailin isə Yaxın Şərqin “mərkəzi” olmadığını deyib. O, Avropanın da Vaşinqtonla münasibətlərdə mövqeyinin zəiflədiyini iddia edib. İran rəsmisi mümkün yeni danışıqlarla bağlı iranlılara xəbərdarlıq edib. Onun sözlərinə görə, Tehran rəqiblərinin danışıqlar masasına qayıtmasına ehtiyatla yanaşmalıdır. Taib qarşı tərəfi əvvəlki öhdəliklərini yerinə yetirməməkdə və təzyiq siyasətinə qayıtmaqda ittiham edib. O, ABŞ və İsraildəki iqtisadi problemlərin də onların mövqelərinin zəifləməsinə təsir göstərdiyini iddia edib.

İran “Cənubi Pars” qaz yatağının 14-cü mərhələsindəki zədələnmiş neftayırma zavodunun istehsal gücünün 70 faizini bərpa edib. Müəssisə ötən ilin iyununda baş vermiş 12 günlük müharibə zamanı zərər görüb. Bərpa işlərinə hücumdan dərhal sonra başlanıldığı bildirilir. İran zavodun cari İran təqvim ilinin sonunadək tam bərpa olunmasını planlaşdırır. “Cənubi Pars”da ümumilikdə dörd müəssisə zərər görüb. Ən ciddi dağıntılar üçüncü və beşinci neftayırma zavodlarında qeydə alınıb. İlkin hesablamalarda tam bərpanın ən azı üç il çəkəcəyi nəzərdə tutulurdu. Tehran indi bütün yenidənqurma işlərini iki il ərzində yekunlaşdırmağı hədəfləyir.

Körfəz Əməkdaşlıq Şurası İsrailin işğal altındakı İordan çayının qərb sahilində yaşayış məntəqələrini genişləndirməsini pisləyib. KƏŞ-in baş katibi Casim Məhəmməd əl-Budeyvi E1 layihəsinin irəli aparılmasına etiraz edib. O, bu addımların beynəlxalq legitimliyə açıq çağırış olduğunu bildirib. KƏŞ hesab edir ki, məskunlaşmaların genişləndirilməsi Fələstin xalqının hüquqlarını pozur. Əl-Budeyvi bunun sülh perspektivlərinə və müstəqil Fələstin dövlətinin yaradılması səylərinə zərbə vurduğunu deyib. O, beynəlxalq ictimaiyyəti İsrailin məskunlaşma siyasətinin qarşısını almağa çağırıb. KƏŞ Fələstin ərazilərinin coğrafi və demoqrafik vəziyyətinin dəyişdirilməsinə qarşı olduğunu vurğulayıb. Təşkilat 1967-ci il sərhədləri əsasında, paytaxtı Şərqi Qüds olan müstəqil Fələstin dövlətinə dəstəyini bir daha təsdiqləyib.

İran parlamentinin sədri Məhəmməd Baqir Qalibaf ABŞ-ni bölgədəki müttəfiqlərinin təhlükəsizliyini riskə atmaqda ittiham edib. Onun sözlərinə görə, Vaşinqton bunu İsrailin maraqları naminə edib. Qalibaf İranın qonşu ölkələrdən yeni təhlükəsizlik mexanizmləri ilə bağlı çoxsaylı mesajlar aldığını bildirib. O, həmin dövlətlərin adlarını açıqlamayıb. Tehran regional iqtisadi əməkdaşlığın genişləndirilməsinin də müzakirə edildiyini bildirir. Qalibaf xarici qüvvələrdən asılı olmayan təhlükəsizlik sisteminin yaradılmasını müdafiə edib. Onun fikrincə, bölgənin öz imkanlarına əsaslanan müstəqil nizam sülh və təhlükəsizliyi təmin edə bilər. Açıqlama İranın regional təhlükəsizlikdə xarici qüvvələrin rolunun azaldılması çağırışları fonunda verilib.

Qəzzada son 48 saat ərzində İsrail hücumları nəticəsində azı iki fələstinli ölüb. Daha dörd nəfərin yaralandığı bildirilir. Məlumatı Qəzza zolağının Səhiyyə Nazirliyi yayıb. Nazirliyin məlumatına görə, ötən ilki atəşkəsdən sonra ölənlərin sayı 1 285 nəfərə çatıb. Eyni dövrdə 4 252 nəfərin yaralandığı bildirilir. 2023-cü il oktyabrın 7-dən bəri Qəzzada ölənlərin ümumi sayı 73 419 nəfər göstərilir. Yaralıların sayının isə 174 364 nəfərə çatdığı açıqlanıb. Son itkilər bölgədə atəşkəsdən sonra da ölüm hallarının davam etdiyini göstərir.

İran ABŞ-nin yeni sanksiya təhdidləri fonunda iqtisadi təzyiqlə üzləşir. Körfəz Beynəlxalq Forumunun baş elmi əməkdaşı Rob Qayst Pinfold diplomatik prosesin də Tehran üçün istənilən nəticəni vermədiyini bildirib. Tərəflər arasında anlaşma memorandumunun müddəti artıq başa çatıb. Ekspertin sözlərinə görə, sənəd nə İranı, nə də ABŞ-ni istədiyi nəticəyə çatdırıb. İran rəhbərliyi daxilində bundan sonra atılacaq addımlarla bağlı fərqli mövqelər mövcuddur. Bəzi qüvvələr diplomatiyanın davam etdirilməsini, digərləri isə daha sərt yanaşmanı dəstəkləyir. Tehran iqtisadi təzyiq və diplomatik dalan arasında mürəkkəb seçim qarşısında qalıb. Ekspert hesab edir ki, hazırda böhranın hansı istiqamətdə inkişaf edəcəyinə dair aydın cavab yoxdur.

İraq Prezidenti Nizar Amidi ölkə ərazisinin başqa dövlətlərə hücum üçün istifadə edilməsinə icazə verilməyəcəyini bildirib. O, İraq daxilindən bölgə ölkələrinə qarşı hücumların heç bir əsasının olmadığını deyib. Prezident ölkədə yalnız iki və ya üç silahlı qruplaşmanın hələ silahlarını təhvil vermədiyini açıqlayıb. Bağdad silahların yalnız dövlətin nəzarətində olması istiqamətində danışıqları davam etdirir. Amidi bölgədəki müharibənin İraq üçün ağır nəticələr yaratdığını bildirib. O, ölkəsinin qarşıdurmaya cəlb edilməməsinə çalışdıqlarını vurğulayıb. İraq Hörmüz boğazındakı problemlərlə bağlı İranla danışıqlar aparır. Prezident ABŞ-nin də müharibəni başa çatdıracaq razılaşmanın əldə edilməsində maraqlı olduğunu düşündüyünü deyib.

Sudanın paytaxtı Xartumun Cənub Kəməri bölgəsində fəaliyyət göstərən bütün xeyriyyə mətbəxlərinin fəaliyyətini dayandırması on minlərlə ailə və köçkünü ağır ərzaq böhranı ilə üz-üzə qoyub. “Radio Dabənqa”nın məlumatına görə, bölgənin geri alınmasından sonra xarici maliyyələşmənin və yardım təşkilatlarına ayrılan vəsaitlərin kəsilməsi nəticəsində mətbəxlər fəaliyyətini dayandırıb. “Sədəqat”, “Hazirin” və “Nida” təşkilatları əvvəllər təxminən 50 min ailəyə yemək təmin edirdi.

Səudiyyə Pro Liqasının Maliyyə Nəzarəti Komitəsi "Əl-Nəsr" klubunun gənclər heyətində çıxış edən bir neçə futbolçu ilə yeni müqavilə bağlamaq müraciətini rədd edib. "Arriyadiyah" qəzetinin yaydığı məlumata görə, maliyyə məhdudiyyəti dövründə klubun həm əsas komandasında, həm də aşağı yaş qruplarında yeni transferlər etməsi və ya mövcud müqavilələrin müddətini uzatması qadağan olunub. Təlimatları pozacağı təqdirdə klubu daha ağır cəzalar gözləyir.

İsveçrənin dünyaca məşhur "Chopard" zərgərlik evi sosial media hesablarında livanlı model Nur Arida və hazırda Ər-Riyadda yaşayan argentinalı gözəl Xorxina Rodrigesi diqqət mərkəzinə çəkib. Lüks brend Kann Kinofestivalının 79-cu buraxılışından xüsusi kadrlar paylaşaraq, hər iki ulduzun qırmızı xalçaya hazırlıq anlarını və gözoxşayan dəbdəbəli obrazlarını nümayiş etdirib.

İordan çayının qərb sahilində İsrail məskunlaşanlarının və İsrail qüvvələrinin fələstinlilərə qarşı hücumları fonunda Fələstin E1 məskunlaşma layihəsinin dayandırılması üçün BMT və Təhlükəsizlik Şurasına müraciət edib. Fələstinin BMT-dəki daimi nümayəndəsi Riyad Mənsur BMT baş katibi Antonio Quterreşə, Təhlükəsizlik Şurasının sədri Danimarkanın nümayəndəsinə və BMT Baş Assambleyasının sədrinə məktublar göndərərək layihəyə qarşı təcili tədbir görülməsini istəyib.

İraq Prezidenti Nizar Amidi ölkədə silahların yalnız dövlətin nəzarətində olması prosesi çərçivəsində 2-3 silahlı qrupun hələ silahlarını təhvil vermədiyini, danışıqların isə davam etdiyini bildirib. Amidinin sözlərinə görə, İraq Konstitusiyası silahların dövlətin əlində cəmləşdirilməsini tələb edir. O, Haşdi Şabi qüvvələrini və digər silahlı qrupları silahlarını təhvil verməyə, təhlükəsizlik qüvvələrinə inteqrasiya olunmağa və siyasi prosesdə iştirak etməyə çağırıb.

Özbəkistan-Azərbaycan IV Regionlararası Forumu Daşkənddə işini başa çatdırıb, Plenar iclas çərçivəsində Özbəkistanın investisiyalar, sənaye və ticarət naziri Laziz Kudratov, Azərbaycanın iqtisadiyyat naziri Mikayıl Cabbarov, iki ölkənin investisiya və ixrac agentliklərinin nümayəndələri, həmçinin Özbəkistan və Azərbaycan regionlarının nümayəndələri çıxış ediblər.

Hindistanın Andhra Pradeş ştatının Visaxapatnam şəhərində 6 yaşlı uşağın müəllimi tərəfindən döyüldükdən sonra ölməsi ölkədə geniş etirazlara səbəb olub. Məlumata görə, uşaq ev tapşırığını yerinə yetirmədiyi üçün müəllim tərəfindən danlanıb və vurulub. Uşağın ailəsi bildirib ki, məktəbin müşahidə kameralarının görüntülərində müəllimin onu çubuqla döydüyü görünür.

Türkiyənin Kocaeli vilayətində, Gölcük Tərsanə Komandanlığında keçirilən TEKNOFEST Mavi Vatan tədbirinə həftəsonu böyük ziyarətçi marağı müşahidə olunur. Milli Müdafiə Nazirliyi və Türkiyə Texnologiya Komandası Vəqfinin əsas təşkilatçılığı ilə keçirilən festivalda Türkiyənin dəniz qüdrətini nümayiş etdirən 37 hərbi gəmi və müxtəlif dəniz platforması sərgilənir.

Dünyanın dörd bir yanından ziyarətçi cəlb edən şəhərə ən çox turist göndərən ölkələr Rusiya, Almaniya və Böyük Britaniya olub. Yanvarın 1-dən avqustun 21-dək 10 milyondan çox xarici turist ağırlayan Antalya, bir tərəfdən də şəhərdə təşkil olunacaq 77-ci Beynəlxalq Kosmonavtika Konqresi (IAC) və BMT-nin İqlim Dəyişmələri üzrə Çərçivə Konvensiyasının Tərəflər Konfransının 31-ci sessiyasına (COP31) hazırlaşır.

İran ABŞ-nin Tehrana qarşı planlaşdırdığı "iqtisadi müharibənin" beynəlxalq hüququ pozduğunu bəyan edib. Xatırladaq ki, ABŞ Prezidenti Donald Tramp Vaşinqtonun Tehran üzərindəki iqtisadi təzyiqi artırmaq cəhdləri çərçivəsində İnanı dəstəkləməyə davam edən ölkələrə sert sanksiyalar tətbiq olunacağı ilə hədələmişdi.

Almaniyanın xarici işlər naziri Yohann Vadeful Ukraynanın Müstəqillik Günü ərəfəsində Kiyevə səfər edib. Səfərin əsas gündəmində Ukraynanın qarşıdakı qışa hazırlığı da yer alır. Bu çərçivədə generatorlar, ehtiyat hissələri və digər enerji texnologiyalarının təqdim edilməsi, enerji sektoruna dəstək və kritik infrastrukturun qorunması məsələlərinə diqqət yetiriləcək.

İran SEPAH-ının baş komandanı, general-mayor Əhməd Vahidi ölkəyə qarşı təhdidlərin davam edəcəyini və İranın müdafiə və hücum imkanlarını gücləndirməli olduğunu bildirib. SEPAH komandanı bildirib ki, müdafiə və hücum gücünün artırılması strategiyasının davam etdirilməsi həm mövcud, həm də gələcək təhdidlərin qarşısının alınması üçün ən effektiv yoldur.

İsrailin Baş naziri Binyamin Netanyahu Qəzzənin gələcəyi ilə bağlı əvvəlki mövqelərini yeni siyasi və təhlükəsizlik şəraitində yenidən gündəmə gətirir. Ekspertlərə görə, Netanyahunun son açıqlamalarında əsas yenilik mövqelərin özündə deyil, onların dəyişən şəraitdə fərqli siyasi məqsədlərlə təqdim edilməsindədir.

40 yaşını keçən portuqaliyalı futbol ulduzu Kriştiano Ronaldo karyerasının son mərhələsinə yaxınlaşsa da, futbolu başa vurduqdan sonra ənənəvi mənada işə ehtiyac duymaya bilər. “Əl-Nəsr”in futbolçusu olan Ronaldo artıq idmandan kənarda da böyük biznes imperiyası qurub. “Əl-Cəzirə”nin məlumatına görə, onun sosial şəbəkələrdə bir milyarddan çox izləyicisi var. Futbolçunun “Instagram” hesabında bir reklam paylaşımının dəyərinin təxminən 3 milyon dollar olduğu bildirilir. “Forbes” isə Ronaldonun meydandan kənar fəaliyyətlərdən son 12 ayda təxminən 65 milyon dollar qazandığını açıqlayıb.

“Mona Liza”nın oğurlanması iki ildən sonra üzə çıxdı

Donald Tramp administrasiyasının region üçün irəli sürdüyü 20 bəndlik sülh planına əsasən Qəzzanın idarəçiliyi həvalə edilən Əli Əbdülhəmid Şaat bölgə boyu toplanmış dağıntı və xarabalıqları Aralıq dənizinə doğru itələyərək onlardan faydalanmağı planlaşdırır. O hesab edir ki, bu addım müharibə başlamazdan əvvəl də dar bir quru zolağında yaşayan Qəzza sakinləri üçün mövcud yaşayış sahəsini genişləndirməyə imkan verə bilər.