BAKI,VOA, Fərid Mikayılov

İran Xarici İşlər Nazirliyinin mətbuat katibi İsmayıl Bəqai son müharibə dövründəki addımların ölkənin qlobal ictimai rəydəki imicini yenidən formalaşdırdığını bəyan edib.

VOA xəbər verir ki, onun bu fikirləri “12 günlük döyüş və İranın milli brendi məsələsi” adlı kitabın təqdimat mərasimində səsləndirilib.

Mətbuat katibi bildirib ki, onilliklər ərzində İrana qarşı sistemli mənfi təbliğat aparılaraq ölkə bir təhlükə kimi təqdim olunub və bu dezinformasiya qlobal qərar qəbulu proseslərinə təsir göstərmək üçün əsas götürülüb.

Bəqai bu prosesi "şeytanlaşdırma və insanlıqdan kənarlaşdırma" adlandıraraq, son bir il yarımda yaşanan hadisələrin sabit stereotipləri, xüsusən də İran dövlət strukturunun yalnız ayrı-ayrı şəxslərdən asılı olması barədəki yanlış fərziyyələri darmadağın etdiyini diqqətə çatdırıb.

XİN rəsmisi əlavə edib ki, İran fərdlərdən deyil, möhkəm institutlardan ibarət dövlətdir və xalqın həm hərbi, həm də diplomatiya sahəsindəki davranışı ölkənin yüksək sivilizasiya potensialını bir daha nümayiş etdirib.