BAKI,VOA,Yusif Şərifzadə
İran İslam İnqilabı Keşikçiləri Korpusunun (SEPAH) Hərbi Dəniz Qüvvələri son 24 saat ərzində Hörmüz boğazında xəbərdarlıq atəşi açdıqdan sonra dörd gəmini dayandırdıqlarını açıqlayıb.
VOA xəbər verir ki, İran dövlət televiziyasının yaydığı məlumata görə, dayandırılan gəmilər Hörmüz boğazının cənub dəhlizi ilə hərəkət etməyə cəhd göstəriblər.
SEPAH həmin marşrutu "təhlükəli keçid" kimi qiymətləndirdiyini və bu səbəbdən gəmilərin hərəkətinin dayandırıldığını bildirib.
İran hərbi qurumu bəyan edib ki, Hörmüz boğazından onların təsdiqləmədiyi marşrutlarla keçməyə çalışan istənilən gəmi "qətiyyətli cavabla" üzləşəcək.
Bu açıqlama dünya enerji ticarəti üçün strateji əhəmiyyət daşıyan Hörmüz boğazında gəmiçilik təhlükəsizliyi və beynəlxalq yük daşımalarının gələcəyi ilə bağlı narahatlıqları yenidən artırıb.
İranın açıqladığı məlumat müstəqil mənbələr tərəfindən hələlik təsdiqlənməyib və dayandırılan gəmilərin mənsubiyyəti barədə əlavə məlumat verilməyib.