BAKI,VOA,Yusif Şərifzadə

İran İnqilab Keşikçiləri Korpusu ABŞ-nin İranın cənubuna endirdiyi zərbələrə cavab olaraq Bəhreyn və Küveytdə 85-ə yaxın məntəqəni hədəfə aldığını bildirib.

VOA xəbər verir ki, bu barədə İranın hərbi dairələri məlumat yayıb.

Məlumata görə, hədəflər arasında ABŞ-nin Beşinci Donanması və Küveytdə yerləşən Əli əs-Salem hərbi bazası da olub. İranın hərbi rəhbərliyi ABŞ hücumlarına qarşı sərt cavab veriləcəyini bəyan edib.

İran rəsmiləri ABŞ Prezidenti Donald Trampın son açıqlamalarını kəskin tənqid ediblər. İran parlamentinin sədri Məhəmməd Baqir Qalibaf bildirib ki, Trampın bəyanatları cavabsız qalmayacaq. Prezident Məsud Pezeşkian da ABŞ tərəfinin təhdidlərini pisləyib.

İran Xarici İşlər Nazirliyi son hücumları ABŞ-la əldə olunan anlaşma sənədinin açıq şəkildə pozulması kimi qiymətləndirib. Nazirlik bu addımın gələcək danışıqlar üçün ciddi maneə yaratdığını bildirib.

Tehran rəsmiləri Hörmüz boğazının idarə olunmasının yalnız İran və bölgədəki aidiyyəti dövlətlərin, o cümlədən Oman kimi ölkələrin iştirakı ilə həyata keçirilə biləcəyini vurğulayıblar.

Eyni zamanda, ABŞ-nin İran neftinə dair güzəşti dayandırması vəziyyəti daha da gərginləşdirib. İran daxilində isə son hücumlar fonunda əhalinin hakimiyyət ətrafında birləşdiyi bildirilir.