BAKI,VOA,Yusif Şərifzadə

Misirin xarici işlər naziri Bədr Əbdülati Hörmüz və Bab əl-Məndəb boğazları, eləcə də Qırmızı dənizdə gəmilərin sərbəst hərəkətinə maneələrin qəbuledilməz olduğunu bildirib. O, heç bir ölkəyə strateji dəniz yollarında sərbəst hərəkətə mane olmağa imkan verilməməli olduğunu vurğulayıb.

VOA xəbər verir ki, Bədr Əbdülati bu barədə Misirin Əl-Ələmeyn şəhərində keçirilən mətbuat toplantısında danışıb. Nazir xüsusilə Hörmüz boğazı, Bab əl-Məndəb boğazı və Qırmızı dənizdə gəmilərin sərbəst hərəkətinin təmin edilməsinin vacibliyini bildirib.

Əbdülati dəniz daşımalarına qarşı təhdidlərin regional və beynəlxalq təhlükəsizliyə birbaşa təhlükə yaratdığını deyib. Onun sözlərinə görə, strateji su yollarında yaranan gərginlik yalnız bölgə ölkələrinə deyil, daha geniş coğrafiyaya təsir göstərir.

Misirin xarici işlər naziri dəniz yollarındakı maneələrin beynəlxalq təchizat zəncirlərinə də mənfi təsir göstərdiyini vurğulayıb. O bildirib ki, malların və enerji ehtiyatlarının daşınmasındakı çətinliklər dünya iqtisadiyyatı üçün əlavə problemlər yarada bilər.

Əbdülati bütün strateji boğazlarda gəmilərin sərbəst hərəkətinin qorunmasının vacibliyini qeyd edib. Nazir bunun beynəlxalq qaydalara uyğun şəkildə təmin edilməli olduğunu bildirib.

Misir Hörmüz və Bab əl-Məndəb boğazları ilə yanaşı, Qırmızı dənizdə təhlükəsizliyin qorunmasına da xüsusi əhəmiyyət verir. Qahirə bu su yollarında yaranan hər hansı təhlükənin beynəlxalq ticarətə və enerji daşımalarına təsir göstərə biləcəyini bildirir.

Əbdülati beynəlxalq ictimaiyyətin dəniz yollarının təhlükəsizliyinin qorunması istiqamətində məsuliyyətli davranmasının vacibliyini vurğulayıb. Onun sözlərinə görə, sərbəst gəmiçilik regional və beynəlxalq təhlükəsizliyin əsas şərtlərindən biridir.