BAKI,VOA, Orxan Qədirzadə

Yaxın Şərqdə gərginliyin artdığı bir vaxtda Hörmüz boğazı ilə bağlı yeni hərbi ssenarilər gündəmə gəlib.

VOA xəbər verir ki, “Axios” nəşrinin mənbəyə istinadən yaydığı məlumata görə, ABŞ-da Hörmüz boğazının bir hissəsinə nəzarətin ələ keçirilməsini nəzərdə tutan alternativ plan müzakirə olunur.

Məlumata əsasən, təqdim olunması gözlənilən bu planın əsas məqsədi strateji əhəmiyyət daşıyan boğazda dəniz nəqliyyatının yenidən açılmasını təmin etməkdir. Mənbə bildirib ki, mümkün əməliyyat yalnız dəniz qüvvələri ilə məhdudlaşmaya və quru qoşunlarının da iştirakını əhatə edə bilər.

Ekspertlər qeyd edirlər ki, Hörmüz boğazı qlobal enerji tədarükünün əsas marşrutlarından biridir və burada baş verəcək hər hansı hərbi müdaxilə dünya bazarlarında ciddi dalğalanmalara səbəb ola bilər.

Analitiklərə görə, belə bir planın reallaşması regionda hərbi eskalasiyanı daha da dərinləşdirə və İran ilə ABŞ arasında gərginliyi kritik həddə çatdıra bilər.

Hazırda rəsmi Vaşinqton tərəfindən məsələ ilə bağlı konkret qərar açıqlanmasa da, mümkün ssenarilər beynəlxalq ictimaiyyət tərəfindən diqqətlə izlənilir.