BAKI,VOA,Yusif Şərifzadə

Səudiyyə Ərəbistanının xarici işlər naziri şahzadə Feysəl bin Fərhan Al Səud Hörmüz və Bab əl-Məndəb boğazları da daxil olmaqla bütün dəniz yollarının açıq və təhlükəsiz saxlanılmasının vacibliyini bildirib. O, dəniz təhlükəsizliyinin Səudiyyə Ərəbistanı ilə Yaponiya arasında ortaq əsas məsələlərdən biri olduğunu vurğulayıb.

VOA xəbər verir ki, Feysəl bin Fərhan bu barədə yaponiyalı həmkarı Toşimitsu Motegi ilə görüşü zamanı danışıb. Səudiyyə Ərəbistanının xarici işlər naziri dəniz yollarının təhlükəsizliyinin və sərbəst fəaliyyətinin təmin edilməsini Ər-Riyadla Tokio arasında əməkdaşlığın əsas istiqamətlərindən biri kimi qiymətləndirib.

Şahzadə Feysəl Hörmüz boğazı, Bab əl-Məndəb boğazı və digər mühüm dəniz yollarının açıq saxlanılmasının beynəlxalq ticarət və bölgənin sabitliyi baxımından mühüm əhəmiyyət daşıdığını bildirib.

Nazirin sözlərinə görə, Səudiyyə Ərəbistanı bölgədə gərginliyin azaldılması və münaqişələrin yenidən alovlanmasının qarşısının alınması istiqamətində səylərini davam etdirir. Ər-Riyad bu məqsədlə bölgədəki qeyri-sabitliyin əsas səbəblərinin aradan qaldırılmasına yönəlmiş hərtərəfli və davamlı diplomatik həllərin tapılmasına üstünlük verir.

Feysəl bin Fərhan Səudiyyə Ərəbistanının diplomatiya, dialoq və dinc vasitələri əsas yol hesab etdiyini vurğulayıb. O, mövcud böhranların hərbi qarşıdurma deyil, danışıqlar və siyasi həll yolları vasitəsilə aradan qaldırılmasına tərəfdar olduqlarını bildirib.

Səudiyyə Ərəbistanının xarici işlər naziri Yaponiyanın beynəlxalq hüququn prinsiplərinin müdafiəsindəki mövqeyini də yüksək qiymətləndirib. O, Tokionun humanitar və inkişaf sahələrində fəaliyyətini, eləcə də sabitlik və dinc həll yollarına verdiyi dəstəyi qeyd edib.

Ər-Riyadın açıqlaması Hörmüz və Bab əl-Məndəb boğazlarında gəmiçilik təhlükəsizliyi ilə bağlı narahatlıqların artdığı bir vaxta təsadüf edir. Hər iki boğaz enerji ehtiyatlarının və digər yüklərin beynəlxalq bazarlara daşınması baxımından strateji əhəmiyyət daşıyır.