BAKI,VOA, Fərid Mikayılov

İranda insan hüquqları ilə bağlı vəziyyətin pisləşdiyi bildirilir.

VOA xəbər verir ki, Birləşmiş Millətlər Təşkilatının məlumatına görə, Yaxın Şərqdə müharibə başlayandan sonra İranda azı 21 nəfər edam edilib, 4 mindən çox insan isə saxlanılıb.

Məlumata görə, edam edilən şəxslərdən bəziləri 2026-cı ilin yanvar ayında baş vermiş etiraz aksiyaları ilə əlaqəli, digərləri isə müxalif qruplara üzvlük və casusluq ittihamları ilə cəzalandırılıb.

Bildirilib ki, saxlanılan şəxslərin bir çoxu zorla yoxa çıxarılma, işgəncə və qeyri-insani rəftar halları ilə üzləşib. Həmçinin bəzi hallarda məcburi etirafların televiziya vasitəsilə yayımlandığı qeyd olunub.

BMT-nin insan hüquqları üzrə ali komissarı Volker Türk bildirib ki, münaqişənin ağır nəticələrinə baxmayaraq, ölkədə vətəndaşların hüquqları kobud şəkildə pozulmaqda davam edir.

O, İran hakimiyyətini edamların dərhal dayandırılmasına, ölüm hökmünə moratorium tətbiq olunmasına və əsassız saxlanılan şəxslərin azad edilməsinə çağırıb.