BAKI,VOA, Fərid Mikayılov

İranın nüvə danışıqları üzrə nümayəndəsi Məhəmməd Baqir Qalibaf ABŞ və İsrailin atəşkəs şərtlərini pozduğunu əsas gətirərək Hörmüz boğazının nəqliyyat üçün açılmasının mümkün olmadığını bəyan edib.

VOA xəbər verir ki, Qalibaf bildirib ki, ABŞ-ın İran limanlarına tətbiq etdiyi dəniz blokadası qlobal iqtisadiyyatı faktiki olaraq “girov” vəziyyətinə salır.

Məsud Pezeşkian isə ölkəsinin danışıqlara açıq olduğunu, lakin sanksiyalar və təhdidlərin real diplomatik prosesə mane olduğunu vurğulayıb.

Məlumata görə, İran İnqilab Keşikçiləri Korpusu tərəfindən boğazda iki yük gəmisinin saxlanılması vəziyyəti daha da gərginləşdirib. İran tərəfi “MSC Francesca” və “Epaminondas” adlı gəmilərin “icazəsiz fəaliyyət” göstərdiyini və naviqasiya sistemlərini dəyişərək gizli keçidə cəhd etdiyini iddia edir.

Giorgos Gerapetritis Yunanıstana məxsus gəmi ilə bağlı insidentin baş verdiyini təsdiqləsə də, gəminin tam ələ keçirilib-keçirilmədiyi barədə dəqiq məlumat verməyib.

ABŞ Prezidenti Donald Tramp İranla atəşkəsin müddətini uzadıb. Ağ Evin sözçüsü Karolin Levitt bu qərarın müddətsiz xarakter daşıdığını açıqlayıb.

Bildirilib ki, Vaşinqton İranın son addımlarını atəşkəs pozuntusu kimi qiymətləndirmir. Eyni zamanda, ABŞ Müdafiə Nazirliyi John Phelanın vəzifədən azad edildiyini, onun səlahiyyətlərini müvəqqəti olaraq Hung Caonun icra edəcəyini açıqlayıb.

Analitiklər hesab edir ki, ABŞ administrasiyası iqtisadi təzyiqi artırmaq üçün prosesi uzadır. Bu vəziyyət fonunda enerji bazarlarında qeyri-müəyyənlik davam edir və bəzi regionlarda yanacaq qiymətlərində artım müşahidə olunur.