BAKI,VOA

Beynəlxalq Atom Enerjisi Agentliyinin (AEBA) Baş direktoru Rafael Qrossi İranın nüvə fəaliyyətləri və ABŞ ilə davam edən müzakirələr barədə mühüm açıqlama verib. VOA xəbər verir ki, "Reuters" agentliyinin məlumatına görə, Qrossi uranın zənginləşdirilməsi prosesinin dayandırılması müddətinin tamamilə siyasi müstəvidə həll olunacağını bildirib.

AEBA rəhbəri qeyd edib ki, hazırda ABŞ ilə danışıqlar masasında olan uranın zənginləşdirilməsinin dayandırılması və bunun nə qədər müddət davam edəcəyi məsələsi texniki deyil, siyasi qərardır.

"Uranın zənginləşdirilməsinin dayandırılması müddətinin müəyyən edilməsi qərarı ABŞ ilə aparılan danışıqlar predmetidir və bu, siyasi bir qərardır."-deyə o bildirib.

Bu bəyanat Pakistanda davam edən İran-ABŞ danışıqları fonunda xüsusi əhəmiyyət kəsb edir. Rafael Qrossinin sözləri göstərir ki, agentlik texniki nəzarəti həyata keçirməyə hazır olsa da, nüvə proqramının dondurulması müddəti və şərtləri Vaşinqtonla Tehran arasındakı siyasi razılaşmadan asılı olacaq.