BAKI,VOA

ABŞ Mərkəzi Komandanlığı (CENTCOM) bəyanat yayaraq, fevralın 28-də İranın Lamerd şəhərindəki idman zalı və yaşayış massivinə edilən hücuma görə ABŞ ordusunun məsuliyyət daşımadığını bildirib.

VOA xəbər verir ki,CENTCOM-un sözçüsü Tim Hokins ordunun "bir neçə media qurumu" tərəfindən yayılan xəbərlərdən sonra insidenti araşdırdığını və "ittihamların saxta olduğunun təsdiqləndiyini" qeyd edib.

Hokinsin bu açıqlaması "New York Times" qəzetində dərc olunan araşdırmadan bir gün sonraya təsadüf edir. Sözügedən araşdırmada hücumda "döyüş şəraitində sınaqdan keçirilməmiş" bir silahdan istifadə edildiyi və həmin silahın "ABŞ istehsalı olan yeni hazırlanmış ballistik raketin xüsusiyyətlərini daşıdığı" iddia olunurdu.

Hadisənin baş verdiyi fevralın 28-də "Al Jazeera" telekanalı da İranın "Fars" xəbər agentliyinə istinadən məlumat yaymışdı. Həmin məlumatda uşaqların idman etdiyi və oynadığı gimnaziya kompleksinə edilən hücum nəticəsində 15 nəfərin həlak olduğu bildirilirdi.

ABŞ rəsmiləri bu iddiaları qəti şəkildə rədd edərək, ordunun Lamerd şəhərindəki sözügedən mülki hədəflərə qarşı hər hansı əməliyyat keçirmədiyini vurğulayıblar.