BAKI,VOA

İran Prezident Administrasiyasının İnformasiya məsələləri üzrə rəhbər müavini ölkənin təhlükəsizlik iyerarxiyasında mühüm dəyişikliyi açıqlayıb.

VOA xəbər verir ki, Məhəmməd Baqir Zülqədr İran Ali Milli Təhlükəsizlik Şurasının yeni katibi təyin olunub.

Prezident aparatından verilən məlumata görə, Məhəmməd Baqir Zülqədr bu vəzifədə Əli Laricanini əvəz edib. Təyinat İranın Ali Rəhbəri, Ayətullah Müctəba Xameneyinin razılığı ilə rəsmiləşib.

Məhəmməd Baqir Zülqədr İranın hərbi və təhlükəsizlik strukturlarında böyük təcrübəyə malik şəxs kimi tanınır. Onun bu vəzifəyə gətirilməsi bölgədə gərginliyin artdığı və İranın milli təhlükəsizlik siyasətinin yenidən formalaşdığı bir dövrə təsadüf edir.

Qeyd edək ki, Ali Milli Təhlükəsizlik Şurası ölkənin hərbi, kəşfiyyat və xarici siyasət strategiyalarını müəyyən edən ən yüksək orqandır.
Təyinatın Ali Rəhbər Müctəba Xameneyi tərəfindən təsdiqlənməsi Zülqədrin ali rəhbərliyə yaxınlığına və dövlətin yeni təhlükəsizlik doktrinasında mühüm rol oynayacağına işarə edir.