BAKI, AzerVoice

Sosial mediada son dövrlərdə populyarlaşan “Yapon yürüşü” adlı fitness metodu, həm fiziki gücü artırmaq, həm də zehni sağlamlığı dəstəkləmək baxımından mütəxəssislərin diqqətini cəlb edib.

TikTok platformasında #FitTok kateqoriyasında yenidən trendə çevrilən bu metod, 2007-ci ildə yapon tədqiqatçılar Hiroshi Nose və Shizue Masuki tərəfindən hazırlanmış və elmi əsaslara söykənən faydaları ilə tanınır.

“Yapon yürüşü” 30 dəqiqəlik məşqdən ibarətdir: 3 dəqiqə sürətli yürüş və 3 dəqiqə yavaş tempdə yürüş növbələşir. Bu aralıqlı sistem məşq fizologiyasında “aşırı yüklenme prinsipi” adlanan mexanizmə əsaslanır. Bu prinsipə görə, qısa müddətli intensiv fəaliyyət orqanizmi uyğunlaşmağa məcbur edir və uzunmüddətli dözümlülüyü artırır.

2007-ci ildə Shinshu Universitetində aparılan ilk tədqiqatda yetkinlər üç qrupa bölünmüşdü. 5 ay ərzində aralıqlı yürüş edənlər yalnız orta tempdə yürüyənlərlə müqayisədə daha yüksək əzələ gücü, daha yaxşı fiziki forma və daha aşağı qan təzyiqi əldə etmişdilər. Sonrakı illərdə aparılan araşdırmalar aralıqlı yürüş metodunun depressiya, yuxu keyfiyyəti və zehni performans kimi sahələrə də faydalı təsirlər göstərdiyini ortaya qoyub.

Mütəxəssislər bu metodun, xüsusilə diabet, ürək-damar xəstəlikləri və piylənmə kimi problemlərin qarşısını almaqda təsirli olduğunu bildirirlər.

“Yapon yürüşü” qan şəkərini tənzimləyir, təzyiqi azaldır və məşqdən sonra daha uzun müddətli enerji sərfiyyatına səbəb olur.

Zehni sağlamlıq baxımından isə, aralıqlı intensivlik diqqət və fokuslanmanı artırmaqla yanaşı, stressin azaldılmasına da kömək edir. Bu səbəbdən bir çox psixoloq bu metodu fərqindəlik və zehni sakitləşmə aləti kimi də tövsiyə edir.

Bu yanaşma yalnız yürüşlə məhdudlaşmır. Mütəxəssislər bildirir ki, metod velosiped, üzgüçülük və hətta güc məşqlərinə də rahatlıqla tətbiq oluna bilər. Bu səbəbdən “Yapon yürüşü” sadəcə bir dəb dalğası deyil, elmi əsaslarla dəstəklənən sağlamlıq strategiyası kimi qiymətləndirilir.