BAKI,VOA

IX əsrdə yaşamış Əbu Hənifə Muhəmməd ibn Əbdürrəhman əl-Bərdəi, İslam elminin inkişaf etdiyi dövrdə Azərbaycanın Bərdə şəhərindən çıxaraq İslam dünyasının mərkəzi hesab olunan Məkkəyə yollanmış görkəmli hədis ravilərindən biridir. Onun həyatı və fəaliyyəti Azərbaycanın orta əsrlər elm tarixində tutduğu mühüm yeri bir daha sübut edir.

Elmi fəaliyyəti və müəllimləri

Əbu Hənifə Bərdəi ömrünün mühüm bir hissəsini müqəddəs Məkkə şəhərində keçirmiş və burada dövrün ən böyük mühəddislərindən (hədis alimlərindən) dərs almışdır. Onun hədis dinlədiyi və elmindən bəhrələndiyi tanınmış alimlər arasında Əhməd ibn Muhəmməd ibn Yunis əl-Yəmami xüsusilə qeyd olunur.

Onun ölüm tarixi dəqiq məlum olmasa da, elmi fəaliyyətinin əsas dövrü IX əsrə təsadüf edir. Bərdəli alimin rəvayət etdiyi hədislər sonradan mötəbər hədis mənbələrində özünə yer tapmışdır.

Rəvayət etdiyi hədislərdən nümunə

Nəql silsiləsində (isnad) Əbu Hənifə Bərdəinin də yer aldığı, Peyğəmbərimizin (s.ə.s) gündəlik həyat və təmizlik (fiqh) qaydalarına dair bir rəvayəti təqdim edirik:

Abdullah ibn Ömər ibn Xəttab (r.a) nəql edir: Atam Ömər ibn Xəttab (r.a) Allah Rəsulundan (s.ə.s) soruşdu: “Bizlərdən biri cünub (qüslü vacib olan halda) ikən yata bilərmi?”

Allah Rəsulu (s.ə.s) belə cavab verdi: “Bəli, namaz üçün dəstəmaz alan kimi dəstəmaz alsın (sonra istəsə yatsın).”

Mənbə: Dosent Elnur Nəsirov/ Orta Əsrlərdə Yaşamış AZƏRBAYCANLI ALİMLƏR, fəqihlər, müfəssirlər, mühəddislər, mütəkəllimlər, ravilər, qarilər …