BAKI,VOA,Yusif Şərifzadə

İsrail ordusu Qəzza zolağında davam edən hərbi əməliyyatlarla paralel olaraq işğal altındakı İordan çayının qərb sahilində də əməliyyatlarını davam etdirir.

VOA xəbər verir ki, Fələstinin Vəfa xəbər agentliyinin yaydığı məlumata görə, çərşənbə günü bölgənin müxtəlif yaşayış məntəqələrində bir neçə insident qeydə alınıb.

Məlumata əsasən, İsrail ordusunun səhər saatlarında Beytləhm şəhərinin cənubunda yerləşən Dəhişə qaçqın düşərgəsində keçirdiyi əməliyyatdan sonra 25 fələstinli saxlanıldığı yerdən azad edilib.

Eyni zamanda, Hebron şəhərinin cənubundakı Yətta qəsəbəsində israilli məskunlaşanların hücumu nəticəsində üç fələstinlinin yaralandığı bildirilir. Məlumata görə, hücum zamanı məskunlaşanlar İsrail hərbçilərinin müşayiəti altında olublar.

Bundan başqa, İsrail qüvvələrinin Hebronun şimal-qərbində yerləşən Beyt Ula qəsəbəsində infrastruktur obyektlərini dağıtdığı qeyd edilir. Dağıdılan obyektlər arasında istehsal müəssisəsi və kənd təsərrüfatı tikililərinin olduğu bildirilir.

Vəfa agentliyinin məlumatına görə, İsrail hərbçiləri Beytləhmin cənubundakı Əl-Xadır qəsəbəsində bir qrup fələstinli fermeri silah tətbiq etməklə hədələyərək torpaq sahələrini tərk etməyə məcbur ediblər.

İsrail tərəfi hadisələrlə bağlı hələlik rəsmi açıqlama verməyib.