BAKI,VOA,Yusif Şərifzadə

Yəmənin beynəlxalq səviyyədə tanınan hökumətinə bağlı qüvvələr ölkənin Hədramaut vilayətində husilər tərəfindən buraxıldığı ehtimal edilən pilotsuz uçuş aparatını vuraraq sıradan çıxarıblar. Bu barədə Yəmən Fövqəladə Qüvvələrinin məlumat mərkəzi açıqlama yayıb.

VOA xəbər verir ki, pilotsuz uçuş aparatı Əs-Səniyyə düşərgəsinin yaxınlığında Yəmən Fövqəladə Qüvvələrinin Birinci Diviziyasının hava hücumundan müdafiə sistemi tərəfindən vurulub. Məlumat mərkəzi məhv edilmiş uçuş aparatının görüntülərini də yayıb.

Yəmən hökumətinə bağlı qüvvələr pilotsuz uçuş aparatının İranın dəstəklədiyi husilər tərəfindən buraxıldığını ehtimal edirlər. Hadisə Hədramaut da daxil olmaqla hökumət qüvvələrinin nəzarətindəki bölgələrdə hərbi gərginliyin artdığı bir dövrə təsadüf edir. Son həftələrdə Hədramaut və qonşu bölgələrdə hökumət qüvvələrinin mövqelərinə hücumların artdığı barədə məlumatlar yayılıb.

Eyni zamanda, Səudiyyə Ərəbistanının dəstəklədiyi Yəmən hökuməti çərşənbə axşamı husilərin mövqelərinə qarşı bir neçə pilotsuz uçuş aparatı hücumu həyata keçirdiyini açıqlayıb.

Hökumət qüvvələrinin məlumatına görə, hücumlar Əl-Məxa, Harib, Beyhan və Şəbvə vilayətindəki digər mövqeləri əhatə edib. Yəməndə son həftələr hökumət qüvvələri ilə husilər arasında pilotsuz uçuş aparatları və raketlərdən istifadə olunan qarşılıqlı hücumlar intensivləşib.

Husilər bundan əvvəl də hökumət qüvvələrinin nəzarətindəki hərbi mövqelərə raket və pilotsuz uçuş aparatları ilə hücumlar həyata keçiriblər. Avqustun əvvəlində Mərib və Hədramaut istiqamətlərində baş verən hücumlarda hökumət qüvvələri arasında itkilərin olduğu bildirilmişdi.