Yəmənin beynəlxalq səviyyədə tanınan hökumətinə bağlı qüvvələr Hədramautda pilotsuz uçuş aparatını vurublar. Uçuş aparatının husilər tərəfindən buraxıldığı ehtimal edilir. Aparat Əs-Səniyyə düşərgəsinin yaxınlığında hava hücumundan müdafiə sistemi vasitəsilə sıradan çıxarılıb. Yəmən Fövqəladə Qüvvələrinin məlumat mərkəzi vurulan aparatın görüntülərini yayıb. Eyni zamanda, Yəmən hökuməti husilərin mövqelərinə qarşı bir neçə pilotsuz uçuş aparatı hücumu həyata keçirdiyini bildirib. Hücumların Əl-Məxa, Harib, Beyhan və Şəbvə vilayətindəki digər əraziləri əhatə etdiyi bildirilir. Son həftələr Yəməndə hökumət qüvvələri ilə husilər arasında hərbi qarşıdurma yenidən güclənib. Tərəflər döyüşlərdə raketlərdən və pilotsuz uçuş aparatlarından daha geniş istifadə edirlər.

BMT Yəməndə 2022-ci ildə əldə edilmiş atəşkəsdən sonra genişmiqyaslı müharibənin yenidən başlaması təhlükəsinin ən yüksək həddə çatdığı barədə xəbərdarlıq edib. BMT-nin Yəmən üzrə xüsusi elçisi Hans Qrundberq ölkənin müxtəlif cəbhələrində hərbi fəallığın artdığını bildirib. Husilərin Məarib, Hədramaut, Əl-Məxa və digər bölgələrdəki hücumları hərbçilər və mülki şəxslər arasında itkilərə səbəb olub. Husilərlə Yəmənin beynəlxalq səviyyədə tanınan hökuməti arasında qarşıdurmanın şiddətlənməsi yeni müharibə qorxusunu artırıb. Qrundberq Qırmızı dəniz və Ədən körfəzində ticarət gəmilərinə hücumların da yenidən artdığına diqqət çəkib. BMT bu hücumların Yəməni daha geniş bölgə qarşıdurmasına sürükləyə biləcəyindən narahatdır. Hörmüz boğazındakı böhran isə bölgədə ticarət və enerji daşımalarına əlavə təzyiq yaradır. BMT-nin məlumatına görə, Yəmən əhalisinin yarıdan çoxu kifayət qədər ərzaq əldə edə bilmir.