BAKI,VOA, Fərid Mikayılov

Səudiyyə Ərəbistanına məxsus hərbi desant gəmisinin Qırmızı dənizdə Husilər tərəfindən ballistik raketlərlə hədəfə alındığı iddia edilib.

VOA xəbər verir ki, Husilərin hərbi sözçüsü Yəhya Səri Qırmızı dənizdə, Hudeydə sahilləri qarşısında Səudiyyə Ərəbistanına məxsus hərbi desant gəmisinin və onu müşayiət edən 4 hərbi katerin bir neçə ballistik raketlə vurulduğunu açıqlayıb.

Yəhya Sərinin sözlərinə görə, hücum “birbaşa və dəqiq” həyata keçirilib. Raket zərbələri nəticəsində hərbi desant gəmisinin tamamilə yandığı, bəzi hərbi katerlərin batdığı, digərlərinin isə yandığı iddia olunub.

Husilərin açıqlamasında Səudiyyə Ərəbistanına məxsus hərbi birliklərin və bölgədəki hərbi yığıncaqların hərəkətlərinin izlənildiyi bildirilib.

Açıqlamaya görə, Səudiyyə Ərəbistanının hərbi qüvvələri quruda və ya dənizdə yerləşməsindən asılı olmayaraq hədəf alınacaq.

Hücum nəticəsində ölən və yaralananların olub-olmaması barədə məlumat verilməyib. Səudiyyə Ərəbistanı hakimiyyət orqanları da hadisə ilə bağlı hələlik açıqlama verməyib.