BAKI,VOA,Yusif Şərifzadə

Yəməndəki husilər Səudiyyə Ərəbistanını Yəmənə qarşı “mühasirəni” genişləndirməməyə və vəziyyəti daha da gərginləşdirməməyə çağırıblar.

VOA xəbər verir ki, husilər yaydıqları bəyanatda Səudiyyə Ərəbistanının Yəmənə qarşı tətbiq etdiyi siyasətin davam etdirilməsinin qarşıdurmanı daha da dərinləşdirə biləcəyini bildiriblər.

Qrup Səudiyyə Ərəbistanının Yəmənə qarşı mühasirəni aradan qaldırmasını, hərbi qüvvələrin bölgədə səfərbər edilməsinə son qoymasını və Yəmən xalqının ölkənin təbii sərvətlərindən istifadə imkanını təmin etməsini tələb edib.

Husilər bildiriblər ki, Səudiyyə Ərəbistanının Yəmənə qarşı siyasətinin dəyişdirilməsinə alternativ yoxdur.

İranla müttəfiq olan husilər 2014-cü ildə Yəmənin paytaxtı Sənanı və ölkənin geniş ərazilərini ələ keçiriblər. Bundan sonra onlar Səudiyyə Ərəbistanının dəstəklədiyi, beynəlxalq səviyyədə tanınan Yəmən hökuməti ilə uzunmüddətli qarşıdurmaya giriblər.

İyulun 20-də husilər Səudiyyə Ərəbistanına qarşı dəniz mühasirəsi elan ediblər. Bu qərar İranın Hörmüz boğazının bağlanmasından sonra Səudiyyə Ərəbistanının neft ixracı üçün Bəb əl-Məndəb boğazına yönəlməsi fonunda verilib.

Son həftələrdə Bəb əl-Məndəb və Qırmızı dənizdə gəmiçiliklə bağlı təhlükəsizlik vəziyyəti daha da gərginləşib. Səudiyyə Ərəbistanının Qırmızı dənizdəki neft daşımalarının bir hissəsini alternativ marşrutlara yönəltdiyi bildirilir.

Birləşmiş Millətlər Təşkilatı da Yəmənin 2022-ci ildə əldə olunan atəşkəsdən sonra genişmiqyaslı münaqişəyə qayıtmaq baxımından ən ciddi təhlükə ilə üzləşdiyini açıqlayıb.