Yəməndəki husilər Səudiyyə Ərəbistanını gərginliyi artırmamaq barədə xəbərdar ediblər. Husilər Səudiyyə Ərəbistanının Yəmənə qarşı tətbiq etdiyi mühasirəyə etiraz ediblər. Qrup mühasirənin aradan qaldırılmasını və hərbi səfərbərliyin dayandırılmasını tələb edib. Husilər həmçinin Yəmən xalqının ölkənin təbii sərvətlərindən istifadə etməsinə şərait yaradılmasını istəyiblər. İyulun 20-də husilər Səudiyyə Ərəbistanına qarşı dəniz mühasirəsi elan ediblər. Bu addım Hörmüz boğazının bağlanmasından sonra Səudiyyə Ərəbistanının neft ixracı üçün Bəb əl-Məndəb boğazından istifadəyə yönəlməsi ilə əlaqələndirilir. Bölgədə gəmiçilik təhlükəsizliyi son həftələrdə daha da pisləşib. Birləşmiş Millətlər Təşkilatı Yəməndə genişmiqyaslı qarşıdurmanın yenidən alovlanması təhlükəsinin artdığını bildirib.