BAKI,VOA, Fərid Mikayılov

Gürcüstan Türkmənistandan neft idxalını genişləndirmək və emal imkanlarını artırmaq istiqamətində yeni mərhələyə qədəm qoyur.

VOA xəbər verir ki, Qara dəniz sahilində yerləşən Kulevi şəhərində fəaliyyət göstərən “Black Sea Petroleum” zavodu xammal bazasını diversifikasiya etmək strategiyasını həyata keçirməyə başlayıb.

Layihə çərçivəsində əsas diqqət Türkmənistan və Qazaxıstandan gətiriləcək xam neftin emalına yönəldiləcək.

Şirkətin rəhbərliyi yaxın aylarda Türkmən neftinin tədarükü ilə bağlı razılaşmaların əldə olunduğunu açıqlayıb. Azərbaycan ərazisi üzərindən keçən logistika marşrutlarının koordinasiyası artıq yekun mərhələdədir və yaxın vaxtlarda müntəzəm daşımaların başlanacağı gözlənilir.

600 milyon dollar dəyərində qiymətləndirilən Kulevi layihəsi artıq ilkin mərhələsini tamamlayıb. İllik 1,2 milyon ton emal gücünə malik olan zavod hazırda nafta, mazut və dizel komponentləri istehsal edir. Məhsulların əsas alıcıları arasında beynəlxalq enerji şirkətləri yer alır.

Məlumata görə, layihənin ikinci mərhələsinin 2027-ci ilin əvvəlində tamamlanması planlaşdırılır. Bu mərhələdə zavodun illik istehsal gücü 4,5 milyon tona qədər artırılacaq və yüksək keyfiyyətli yanacaq növlərinin istehsalı təmin olunacaq.

Ekspertlər hesab edir ki, Xəzər hövzəsindən xammalın cəlb edilməsi Gürcüstan üçün strateji əhəmiyyət daşıyır. Bu addım həm ölkənin enerji sektorunda rəqabət qabiliyyətini artıracaq, həm də Avropa bazarlarına ixrac imkanlarını genişləndirəcək.