BAKI, AzerVoice, Fərid Mikayılov
Macarıstan Türkmənistanla enerji sahəsində əməkdaşlığı genişləndirməyə hazır olduğunu açıqlayıb.
AzerVoice xəbər verir ki, ölkə rəsmiləri yaxın gələcəkdə Türkmən qazının Avropaya, xüsusilə də Macarıstana çatdırılmasını hədəfləyir.
"Energetika sahəsində Türkmənistanı etibarlı tərəfdaş kimi görürük. Macarıstan müxtəlif ölkələrdən qaz idxal edir və ümid edirik ki, yaxın vaxtlarda Türkmənistan Avropaya, xüsusilə də ölkəmizə qaz ixracçısına çevriləcək"- deyə Aşqabadda keçirilən İqtisadi əməkdaşlıq üzrə Türkmənistan–Macarıstan hökumətlərarası komissiyasının altıncı iclasında çıxış edən Macarıstan Xarici İşlər və Ticarət Nazirliyinin Şərq əlaqələrinin inkişafı üzrə dövlət katibinin müavini Adam Ştifter bildirib.
Macarıstanın Avropa İttifaqı üzrə dövlət katibinin müavini Piter Holiç isə mətbuata açıqlamasında əlavə edib ki, danışıqlar zamanı Xəzər dənizində karbohidrogenlərin kəşfiyyatı və hasilatı, Türkmənistandan qaz tədarükü, eləcə də bərpa olunan enerji sahəsində birgə layihələr müzakirə olunub.
O həmçinin Macarıstan nümayəndə heyətinin 22–24 oktyabr tarixlərində Aşqabadda keçiriləcək “Türkmənistanın Nefti və Qazı – 2025” beynəlxalq konfrans və sərgidə iştirak edəcəyini təsdiqləyib.
Komissiyanın altıncı iclası 29–30 sentyabrda Aşqabadda baş tutub. Növbəti görüşün Macarıstanın paytaxtı Budapeştdə keçirilməsi planlaşdırılır.