BAKI,VOA Orxan Qədirzadə

Türkiyənin Kənd Təsərrüfatı və Meşə naziri İbrahim Yumaklı Aydın vilayətinin Çinə, Balıkesir vilayətinin Susurluk və İzmir vilayətinin Buca rayonlarında baş verən meşə yanğınlarının tamamilə nəzarət altına alındığını açıqlayıb.

Nazir Yumaklı sosial media hesabında etdiyi paylaşımda yanğınlara havadan və qurudan aparılan effektiv mübarizə nəticəsində nəzarət edildiyini bildirib.

“Effektiv mübarizə nəticəsində Aydın-Çinə, Balıkesir-Susurluk və İzmir-Buca yanğınları tamamilə nəzarət altına alındı”, – deyə Yumaklı qeyd edib.

Nazir bildirib ki, küləyin gücləndiyi iyulun 29-dan etibarən Türkiyə üzrə ümumilikdə 314 yanğına müdaxilə edilib. Onlardan 192-si meşə ərazilərindən kənarda baş verib.

Yumaklı yanğınsöndürən qrupların, hava və quru texnikalarının fasiləsiz fəaliyyəti nəticəsində bütün yanğınların nəzarət altına alındığını vurğulayıb.

Bununla yanaşı, nazir meşə yanğınları riskinin hələ də davam etdiyini və ekipajların 24 saat növbədə qalacağını bildirib.

“Xahişimiz budur ki, ehtiyatı əldən verməyək. Açıq ərazidə od yandırmayaq, yanğına səbəb ola biləcək davranışlardan uzaq duraq. Ən kiçik tüstü və ya alov gördükdə 112 Təcili Çağrı Mərkəzinə məlumat verək”, – deyə Yumaklı çağırış edib.

O, meşələrin gələcək nəsillərə əmanət olduğunu qeyd edərək, “yaşıl vətənin” qorunmasının hər kəsin ortaq vəzifəsi olduğunu bildirib.