BAKI,VOA Orxan Qədirzadə
Türkiyədə terrorla mübarizə və hüquqi islahatlarla bağlı proses davam edərkən, PKK silahlı qruplaşmasının İraqın şimalındakı Qara dağında yerləşən əsas mövqelərindən birini tərk etdiyi iddia olunur.
Məlumata görə, təşkilat Qara dağındakı Siyani düşərgəsini və Bahar Təpəsi adlanan ərazini boşaldıb. Bildirilir ki, bölgədə fəaliyyət göstərən təhlükəsizlik qüvvələri düşərgənin boşaldıldığını təsdiqləyiblər.
Eyni zamanda, Türkiyə mətbuatında yer alan iddialara əsasən, ölkədə terrorun tam aradan qaldırılması istiqamətində hazırlanan çərçivə qanunu layihəsi PKK-nın həbsdə olan lideri Abdullah Öcalana təqdim edilib.
İddialarda bildirilir ki, Abdullah Öcalan sənədi qiymətləndirib və layihə ilə bağlı tərəflər arasında qarşılıqlı razılıq əldə olunub.
Rəsmi qurumlar tərəfindən sözügedən iddialarla bağlı hələlik hər hansı açıqlama verilməyib. Buna görə də məlumatlar müstəqil şəkildə təsdiqini tapmayıb.