BAKI,VOA, Fərid Mikayılov

Türkiyənin Milliyyətçi Hərəkat Partiyasının (MHP) sədri Devlet Bahçeli Türkiyə Böyük Millət Məclisində keçirilən partiya qrup iclasında çıxış edərək ölkənin daxili və xarici siyasət gündəminə dair geniş açıqlamalar verib.

VOA xəbər verir ki, Bahçeli çıxışında Türkiyənin geosiyasi mövqeyi, xarici siyasət prioritetləri, Kipr məsələsi, terrorla mübarizə və iqtisadi hədəflər daxil olmaqla bir çox istiqamətdə mesajlar səsləndirib. O, milli birlik və səfərbərlik çağırışı edərək Türkiyənin regional güc roluna diqqət çəkib.

“Türkiyə siyasi şüarlarla yox, real güclə yazılır”

MHP lideri bildirib ki, Türkiyə Balkanlar, Qafqaz, Qara dəniz, Şərqi Aralıq dənizi, Orta Şərq, Türk dünyası, Afrika və Avropa arasında strateji körpü rolunu oynayır.

Onun sözlərinə görə, Türkiyə öz yolunu siyasi şüarlarla deyil, istehsal, diplomatiya, müdafiə sənayesi, enerji layihələri, logistika və milli həmrəyliklə formalaşdırır.

Bahçeli qeyd edib ki, “Türk və Türkiyə əsrinin” gerçəkləşməsi yalnız realist və güc mərkəzli yanaşma ilə mümkündür.

Xarici siyasət və “sülh, lakin passivlik yox”

Çıxışında xarici siyasətə toxunan Bahçeli bildirib ki, Türkiyə sülhü prioritet hesab edir, lakin bu, passivlik demək deyil.

O vurğulayıb ki, diplomatiya başqa güclərin hesabına hərəkət etmək anlamına gəlmir və Türkiyə danışıqlarda yalnız öz milli maraqları və təhlükəsizliyi əsasında iştirak edir.

Şərqi Aralıq dənizi və Kipr mesajı

Bahçeli Şərqi Aralıq dənizindəki proseslərə də toxunaraq Fransa, Yunanıstan, Cənubi Kipr Rum Administrasiyası və İsrailin bölgədə yaratmağa çalışdığı təhlükəsizlik və enerji mərkəzi təşəbbüslərinin diqqətlə izlənildiyini bildirib.

O, Fransa Prezidenti Emmanuel Macronu tənqid edərək onu “Napoleonçu ambisiyalara qapılmaqda” ittiham edib.

Bahçəli bildirib ki, Kipr Türkiyə üçün strateji əhəmiyyət daşıyır və Kipr türklərinin təhlükəsizliyi heç bir şübhəyə buraxıla bilməz.

Onun sözlərinə görə, Yunanıstanın iddiaları hüquqi əsas yaratmır, Cənubi Kipr Rum Administrasiyasının bütün adanı təmsil etmə iddiası legitimlik daşımır, İsrailin isə təhlükəsizlik siyasətini Türkiyəyə qarşı yönəltməsi regionda davamlı sülh yaratmır.

“Kipr yalnız torpaq deyil, strateji yaddaşdır”

MHP sədri bildirib ki, Kipr Türkiyənin təhlükəsizlik dərinliyinin bir hissəsidir və dəniz sərhədləri ilə bağlı əsas strateji əhəmiyyət daşıyır.

O həmçinin Kiprdə torpaq alqı-satqısı və xarici mülkiyyətin strateji ərazilərdə artmasının sadə iqtisadi məsələ kimi qiymətləndirilə bilməyəcəyini deyib.

“Geniş milli səfərbərlik lazımdır”

Bahçeli çıxışında iqtisadi, mədəni və texnoloji sahələrdə geniş səfərbərlik çağırışı edib.

İqtisadi sahədə istehsalın artırılması, investisiyaların genişləndirilməsi və enerji təhlükəsizliyinin gücləndirilməsi, mədəni sahədə isə Türkiyənin tarixi və mədəni irsinin dünyaya daha güclü çatdırılması, texnoloji sahədə isə süni intellekt, kibertəhlükəsizlik və müdafiə sənayesinin inkişafı vurğulanıb.

“Terrorsuz Türkiyə” mesajı

MHP lideri terrorla mübarizəyə də toxunaraq “Terrorsuz Türkiyə” hədəfinin təslimiyyət və ya güzəşt olmadığını bildirib.

Onun sözlərinə görə, bu proses Türkiyənin təhlükəsizliyi, sosial sabitliyi və iqtisadi inkişafı üçün əsas mərhələdir.

Abdullah Öcalanla bağlı açıqlama və yeni təklif

Çıxışın ən diqqətçəkən hissələrindən biri isə Abdullah Öcalan ilə bağlı açıqlama olub.

Bahçeli bildirib ki, Öcalanın status məsələsi müzakirə edilməli və bu məsələ prosesdən kənarda saxlanmamalıdır. Onun sözlərinə görə, bu məsələnin nəzərə alınmaması prosesin düzgün irəliləməsinə mane ola bilər.

O deyib ki, əgər çağırışın nəticə verməsi istənilirsə, təşkilatın tam ləğvi və silahların təhvil verilməsi prosesində hüquqi, siyasi və vicdani qiymətləndirmə aparılmalıdır.

Bahçəli həmçinin bildirib:

“Abdullah Öcalan üçün status boşluğu varsa, bu boşluq Türkiyə Respublikasının xeyrinə, terrorsuz Türkiyə hədəfinin uğuruna xidmət edəcək şəkildə qiymətləndirilməlidir.”

Sonda MHP sədri “Sülh Prosesi Koordinatorluğu yaradılmasını təklif edirəm” deyərək yeni institusional mexanizm təşəbbüsü irəli sürüb.