BAKI,VOA Orxan Qədirzadə

ABŞ administrasiyası Türkiyəyə təxminən 700 milyon ABŞ dolları dəyərində reaktiv təyyarə mühərriklərinin satışına dair rəsmi bildirişi ABŞ Konqresinə təqdim edib. Bu addım Vaşinqton və Ankara arasında müdafiə sənayesi sahəsində əməkdaşlığın genişlənməsi istiqamətində atılan mühüm mərhələ kimi qiymətləndirilir.

Məlumata görə, ABŞ Dövlət Departamenti reaktiv mühərriklərin Türkiyəyə mümkün satışı ilə bağlı rəsmi proseduru başladaraq Konqresə müvafiq bildiriş göndərib.

Qeyd olunur ki, qərar iyulun 7-8-də Ankarada keçiriləcək NATO liderlərinin 36-cı sammiti ərəfəsində qəbul edilib və bu addım ABŞ Prezidenti Donald Trampın Türkiyə ilə müdafiə sahəsində əməkdaşlığın inkişafına verdiyi dəstəyin göstəricisi kimi qiymətləndirilir.

ABŞ Prezidenti Donald Tramp bir gün əvvəl Ağ Evdə NATO-nun Baş katibi Mark Rütte ilə keçirdiyi birgə mətbuat konfransında Türkiyəyə reaktiv mühərrikləri və F-35 qırıcılarının satışı ilə bağlı suala cavabında Ankara üçün müsbət qərarın verilə biləcəyini bildirmişdi.

Tramp qeyd etmişdi ki, Türkiyə NATO-nun güclü üzvlərindən biridir və onun fikrincə, Ankara ilə bağlı Türkiyə Prezidenti Rəcəb Tayyib Ərdoğanı sevindirəcək addım atılması mümkündür.

Bundan əvvəl də ABŞ administrasiyasının sözügedən satışın reallaşdırılmasında maraqlı olduğu barədə məlumatlar yayılmışdı.

Son illərdə Türkiyənin 2019-cu ildə Rusiyadan aldığı S-400 hava hücumundan müdafiə sistemlərini istismarda saxlaması ABŞ Konqresində bir sıra qanunvericilərin Ankaraya silah və hərbi avadanlıq satışına etiraz etməsinə səbəb olmuşdu.

Bununla belə, administrasiyanın Konqresə göndərdiyi son rəsmi bildiriş Türkiyəyə reaktiv mühərriklərinin mümkün satışı istiqamətində indiyədək atılmış ən konkret addımlardan biri hesab olunur.

ABŞ qanunvericiliyinə əsasən, Konqres müəyyən edilmiş müddət ərzində etiraz etmədiyi halda, satış proseduru növbəti mərhələyə keçə bilər.