BAKI,VOA, Fərid Mikayılov

Türkiyənin nəqliyyat və infrastruktur naziri Abdulkadir Uraloğlu regional münaqişənin başlamasından bəri Türkiyəyə məxsus 11 gəminin qlobal enerji daşımaları üçün kritik əhəmiyyət kəsb edən Hörmüz boğazından tam təhlükəsiz şəraitdə keçərək Fars körfəzini tərk etdiyini elan edib.

VOA xəbər verir ki, Uraloğlunun bəyanatına görə, rəsmi Ankara Hörmüz boğazı və Bəsrə körfəzindəki hərbi təhdidləri və dəniz naviqasiyasındakı geosiyasi inkişafları anbaan izləyir.

"Son olaraq iyunun 21-i səhər saatlarında daha iki gəminin ərazini tənzimlənən qaydada tərk etməsi ilə, müharibənin başlanğıcından bəri Türk sahibkarlara məxsus ümumilikdə 11 gəmi Hörmüz boğazını uğurla keçib"- deyə nazir vurğulayıb.

Hazırda Hörmüz boğazı və Bəsrə körfəzi sularında, 7 Türk gəmisinin qaldığı və bu gəmilərin heyət tərkibində 177 Türkiyə vətəndaşının xidmət etdiyi bildirilib.

Nazir qeyd edib ki, sözügedən regional sulardakı aktiv gəmilərdən biri birbaşa Türkiyə bayrağı altında üzür və dövlət hər bir şəraitdə vətəndaşların, eləcə də dəniz ticarət donanmasının təhlükəsizliyini təmin etmək üçün zəruri preventiv müdafiə tədbirlərini icra edir.