BAKI,VOA Nailə Babazadə

Türkiyənin Xarici işlər naziri Hakan Fidan ilə Yunanıstanın Xarici işlər naziri Yorgo Gerapetritis arasında telefon danışığı baş tutub.

VOA xəbər verir ki, Türkiyə Xarici İşlər Nazirliyindən əldə edilən məlumata görə, nazirlər görüş zamanı İsrail ordusunun "Qlobal Sumud" (Global Sumud Flotilla) yardım gəmilərinə qarşı həyata keçirdiyi hərbi müdaxiləni müzakirə ediblər. Tərəflər bölgədəki son vəziyyət və beynəlxalq hüququn pozulması halları ətrafında fikir mübadiləsi aparıblar.

İsrailin Qəzzaya tətbiq etdiyi blokadanı yarmaq və bölgəyə həyati əhəmiyyətli humanitar yardım çatdırmaq məqsədilə yola düşən "Qlobal Sumud" gəmilərinin 2026-cı il Bahar Missiyası aprelin 12-də İspaniyanın Barselona şəhərindən start götürüb.

İtaliyanın Siciliya adasından da iştirakçıların qoşulması ilə aprelin 26-da yenidən hərəkətə keçən flotiliya aprelin 29-u gecə saatlarında Krit adası yaxınlığındakı beynəlxalq sularda İsrail ordusunun qanunsuz hücumuna məruz qalıb. Aktivistləri daşıyan qayıqlar hərbi müdaxilə ilə dayandırılıb.

Flotiliya rəsmilərinin verdiyi məlumata görə, gəmilərdə 39 fərqli ölkədən, aralarında Türkiyə vətəndaşlarının da olduğu cəmi 345 iştirakçı var. Xatırladaq ki, "Qlobal Sumud" flotiliyasının 2025-ci ilin sentyabrındakı ilk cəhdi zamanı da İsrail ordusu beynəlxalq sularda qanunsuz müdaxilə edərək aktivistləri və texnikaları saxlamışdı.