BAKI,VOA, Fərid Mikayılov

Türkiyədən göndərilən tibbi yardım yüklü 6 yük maşını Van şəhərindən İran istiqamətinə yola salınıb.

VOA xəbər verir ki, müxtəlif şəhərlərdəki səhiyyə müəssisələrindən toplanan dərman preparatları, serumlar, tibbi sərf materialları, avadanlıqlar, xərək və oksigen balonları Van Səhiyyə İdarəsində bir araya gətirilib və xüsusi heyət tərəfindən nəqliyyat vasitələrinə yüklənib.

Yardım karvanının Ağrı vilayətinin Doğubayazıt rayonunda yerləşən Gürbulak sərhəd-keçid məntəqəsi vasitəsilə İrana çatdırılması planlaşdırılır.

Van Səhiyyə İdarəsinin rəhbəri Məhəmməd Tosun bildirib ki, bu təşəbbüs müxtəlif bölgələrdən toplanan tibbi vasitələrin koordinasiyalı şəkildə çatdırılmasını təmin etmək məqsədi daşıyır. Onun sözlərinə görə, daha əvvəl də 3 yük maşını ilə yardım göndərilib və son göndərişlə birlikdə ümumi yardım sayı 9 maşına çatır.

Rəsmi şəxslər qeyd ediblər ki, humanitar yardımların davam etdirilməsi nəzərdə tutulur və bu addım regionda səhiyyə əməkdaşlığının gücləndirilməsinə xidmət edir.