BAKI,VOA, Fərid Mikayılov

Türkiyənin xarici işlər naziri Hakan Fidan 23-24 aprel tarixlərində Birləşmiş Krallıqa səfər edəcək. Səfər çərçivəsində onun İngiltərənin xarici işlər və inkişaf naziri Yvette Cooper, parlament üzvləri və digər rəsmi şəxslərlə görüşləri planlaşdırılır.

VOA xəbər verir ki, London proqramı çərçivəsində Fidan Oksford Universitetinin təşkil etdiyi tədbirdə çıxış edəcək, həmçinin İngiltərədə yaşayan türk icması və iş adamları ilə görüşəcək.

Görüşlərdə Türkiyə ilə Birləşmiş Krallıq arasında münasibətlərin mövcud müsbət dinamikası, iqtisadi əməkdaşlığın genişləndirilməsi və tərəfdaşlığın çoxşaxəli şəkildə dərinləşdirilməsi məsələləri müzakirə olunacaq.

Nazirin, iki ölkə arasında ticarət dövriyyəsinin artırılması məqsədilə azad ticarət sazişinin yenilənməsi üzrə danışıqların sürətləndirilməsinin vacibliyini vurğulaması gözlənilir. Bununla yanaşı, İngiltərədə yaşayan çoxsaylı türk icmasının iki ölkə arasında sosial və iqtisadi əlaqələrin güclənməsində mühüm rol oynadığı qeyd ediləcək.

Fidanın çıxışlarında müdafiə sənayesi, enerji, o cümlədən bərpaolunan enerji sahələrində əməkdaşlığın inkişaf etdirilməsi perspektivlərinə də diqqət ayrılacağı bildirilir.

Bundan əlavə, regional və qlobal məsələlər, o cümlədən Rusiya-Ukrayna münaqişəsi, Yaxın Şərqdəki vəziyyət, İran və ABŞ arasında davam edən danışıqlar, həmçinin Hürmüz boğazı ilə bağlı proseslər də müzakirə olunacaq.

Nazirin beynəlxalq platformalarda humanitar məsələlərin, xüsusilə Fələstin və Suriya ilə bağlı vəziyyətin diqqətdə saxlanmasının vacibliyini vurğulayacağı gözlənilir.