BAKI,VOA, Fərid Mikayılov

Ukrayna Rusiya ilə mümkün liderlər görüşünün təşkili üçün Türkiyənin vasitəçiliyinə ümid edir.

VOA xəbər verir ki, Ukraynanın xarici işlər naziri Andrey Sibiqa bildirib ki, Kiyev, prezidentlər Volodimir Zelenski və Vladimir Putin arasında görüşün təşkili üçün bir sıra ölkələrə, xüsusilə də Türkiyəyə müraciət edib.

Nazirin sözlərinə görə, Ukrayna tərəfi Moskva və Minsk şəhərlərini görüş məkanı kimi istisna edir. O vurğulayıb ki, bu iki paytaxtdan başqa hər hansı bir şəhər belə görüşə ev sahibliyi edərsə, Kiyev danışıqlarda iştirak etməyə hazırdır.

Sibiqa qeyd edib ki, Ukrayna bu görüş vasitəsilə diplomatik prosesə yeni dinamika gətirmək niyyətindədir. O, həmçinin əlavə edib ki, rəsmi Kiyev görüşə ABŞ prezidenti Donald Tramp və Türkiyə Prezidenti Rəcəb Tayyib Ərdoğanı mümkün vasitəçilər kimi cəlb etmək istəyir.

Beləliklə, Türkiyə regionda vasitəçi rolunu bir daha ön plana çıxararaq, mümkün Zelenski-Putin görüşü üçün əsas platformalardan biri kimi nəzərdən keçirilir.