BAKI,VOA

Türkiyə Milli Müdafiə Nazirliyinə tabe olan ASFAT və Maşın və Kimya Sənayesi Səhmdar Cəmiyyəti (MKE) Ankarada keçirilən "Məhsuldarlıq və Texnologiya Sərgisi"ndə diqqətçəkən layihələrini nümayiş etdirib.

VOA xəbər verir ki, Tədbirdə MKE-nin 1,5 milyar dollarlıq nəhəng investisiya proqramı ön plana çıxıb.

Bu il istehsala başlaması planlaşdırılan Kırıkkaledəki Hüseyn Kahya Enerji Materialları Fabriki, Türkiyənin müdafiə sənayesində yeni bir dövrün qapısını açacaq.

Strateji partlayıcılar və xammal istehsalı
Fabrikdə nitroselüloz, barıt və raket yanacaqları başda olmaqla, bir çox strateji partlayıcının istehsalı həyata keçiriləcək. Həmçinin, qatılaşdırılmış nitrat turşusu və bərk TNT kimi enerji materiallarının istehsalı da ilk dəfə olaraq reallaşdırılacaq. Bu strateji addım ilə Türkiyənin partlayıcı xammal sahəsində xarici asılılığına tamamilə son qoyulacaq.

İstehsalda böyük sıçrayış
2023-2027-ci illəri əhatə edən investisiya həmləsi ilə Türkiyə müdafiə istehsalında həm potensialını artıracaq, həm də kritik sahələrdə yerli istehsalla xarici asılılığı bitirəcək.

Nəhəng investisiya proqramı çərçivəsində aşağıdakı sahələrdə istehsal gücü dəfələrlə artacaq:
155 mm obus sursatı;
76 mm "Denizhan" milli dəniz topu;
Artilleriya sursatı və 2,75 düymlük raketlər;
60, 81 və 120 mm minaatan sursatları;
Tank və obus sistemləri;
Snayper patronları və yüngül silahlar.