BAKI,VOA Orxan Qədirzadə

İstanbul Cumhuriyyət Baş Prokurorluğu tərəfindən Ahbap Fonduna qarşı aparılan istintaq çərçivəsində saxlanılan media platforması rəhbəri Oğuzhan Uğurun polis idarəsində ifadəsinin alınmasına başlanılıb.

İstintaq çərçivəsində daha əvvəl Ahbap Fondunun təsisçisi Haluk Levent də daxil olmaqla 18 şübhəli barəsində həbs qətimkan tədbiri seçilmişdi.

Araşdırmanın davamı olaraq Oğuzhan Uğur da daxil olmaqla daha 10 nəfər saxlanılıb. Məlumata görə, Oğuzhan Uğurun İstanbulun Vətən Polis İdarəsində ifadəvermə prosesi başlayıb, digər saxlanılan şəxslərlə bağlı istintaq hərəkətləri isə davam etdirilir.

İstintaq "cinayət törətmək məqsədilə təşkilat yaratma", "xüsusilə külli miqdarda dələduzluq" və "cinayət yolu ilə əldə edilmiş əmlakın leqallaşdırılması" maddələri üzrə aparılır.

İstanbul Mali Cinayətlərlə Mübarizə Şöbəsinin İstanbul Cumhuriyyət Baş Prokurorluğunun koordinasiyası ilə həyata keçirdiyi araşdırmalar zamanı Mali Cinayətləri Araşdırma Şurasının (MASAK) hesabatları, bank hesabları üzrə maliyyə hərəkətləri, texniki və fiziki müşahidə materialları təhlil edilib.