BAKI,VOA, Fərid Mikayılov

Türkiyənin Vitse-prezidenti Cevdet Yılmaz ölkə ictimaiyyətinə və müttəfiq dövlətlərə çağırış edərək, FETÖ və bənzəri gizli qruplaşmaların neqativ fəaliyyətlərinə qarşı hər zaman yüksək dərəcədə ayıq-sayıq olmağın vacibliyini bəyan edib.

VOA xəbər verir ki, rəsmi dövlət mediasının yaydığı məlumata görə, vitse-prezident ölkədə və beynəlxalq arenada terror şəbəkələrinə qarşı aparılan mübarizənin cari vəziyyətini şərh edib.

"FETÖ getdi, lakin fərqli adlar və örtüklər altında oxşar strukturların yenidən formalaşması məsələsində son dərəcə diqqətli olmaq məcburiyyətindəyik. Eyni zamanda, FETÖ ilə beynəlxalq müstəvidə mübarizə aparmaq istiqamətində üzərimizə çox böyük məsuliyyət düşür. Türkiyə olaraq topladığımız bu acı təcrübəni dost və qardaş ölkələrlə mütləq bölüşməliyik", – deyə o vurğulayıb.

Cevdet Yılmaz qeyd edib ki, millətlərin gələcəyi güclü dövlət təsisatları ilə yanaşı, həm də güclü tarixi yaddaş üzərində inşa edilir. Yaşanan böyük böhranların və xəyanətlərin cəmiyyətə doğru izah edilməsinin vacibliyinə toxunan rəsmi, 15 İyul dövlət çevrilişinə cəhd hadisəsini sadəcə xatırlamağın yetərli olmadığını, onun mahiyyətini gələcək nəsillərə dərindən ötürməyin əsas hədəf olduğunu bildirib.

Vitse-prezident bu şüurun və milli iradə ruhunun diri saxlanılmasının akademiyanın, düşüncə mərkəzlərinin və media qurumlarının ortaq vəzifəsi olduğunu diqqətə çatdırıb. O əlavə edib ki, Türkiyə öz təhlükəsizlik təcrübəsini digər dövlətlərlə paylaşmaqla həm də həmin ölkələrin daxili sabitliyinə önəmli bir qlobal töhfə vermiş olacaq.