BAKI,VOA, Fərid Mikayılov

Ədliyyə naziri Akın Gürlək Şanlıurfa və Kahramanmaraşda baş vermiş məktəb hücumları ilə bağlı 95 nəfərin saxlanıldığını açıqlayıb.

VOA xəbər verir ki, hadisələrlə bağlı Kahramanmaraş və Siverek prokurorluqları tərəfindən çoxşaxəli istintaq aparılır.

Qeyd olunub ki, istintaq çərçivəsində hadisə görüntülərini yayaraq ictimai panika yaradan, rəsmi məlumatları təhrif edən və cinayəti təşviq edən çoxsaylı sosial media hesabları müəyyən edilib.

Bildirilib ki, 55 prokurorluq tərəfindən 130 hesab sahibi barəsində araşdırma başlanılıb, nəticədə 95 nəfər saxlanılıb, daha 35 nəfərin tutulması istiqamətində əməliyyatlar davam edir.

Məlumata görə, ümumilikdə 1104 sosial media hesabına giriş məhdudlaşdırılıb.

Qeyd edilib ki, məktəblərə hücum çağırışları edən və ictimaiyyətdə təşviş yaradan paylaşımlar edən 67 istifadəçi də saxlanılıb.

Bildirilib ki, Ankara prokurorluğu tərəfindən uşaqları zorakılığa təşviq edə biləcək rəqəmsal məzmunlara qarşı əlavə tədbirlərin görülməsi üçün hüquq-mühafizə orqanlarına tapşırıq verilib.

Məlumata əsasən, proses ölkə üzrə 171 prokurorluq tərəfindən, müvafiq dövlət qurumları ilə koordinasiyalı şəkildə davam etdirilir.