BAKI,VOA, Orxan Qədirzadə

Türkiyə Milli Kəşfiyyat Təşkilatı (MİT), Prezident Rəcəb Tayyib Ərdoğanın tapşırığı ilə ABŞ, İsrail və İran arasındakı gərginliyi azaltmaq üçün kilit rol üstlənib.

VOA xəbər verir ki, MİT rəhbərliyi ABŞ-İsrail və İran arasındakı hərbi münaqişənin dayandırılması və atəşkəs prosesinin asanlaşdırılması məqsədilə genişmiqyaslı diplomatik fəaliyyətə başlayıb. MİT münaqişənin daha geniş bölgəyə yayılmasının qarşısını almaq üçün bütün müvafiq qurumlarla koordinasiyalı şəkildə aktiv səylər göstərir.

Məlumata görə, kəşfiyyat diplomatiyası çərçivəsində MİT rəhbərliyi indiyədək 13-dən çox ölkənin müvafiq xidmətləri və rəsmi nümayəndələri ilə sıx təmasda olub. Arxa planda aparılan bu "səssiz diplomatiya" bütün tərəflərlə birbaşa əlaqə quraraq gərginliyin böyüməsinin qarşısını almağa və tərəfləri ortaq məxrəcə gətirməyə yönəlib.

MİT-in bu prosesdəki əsas hədəfi regionda sabitliyin bərpa edilməsi və humanitar böhranın dərinləşməməsi üçün atəşkəs xəttini formalaşdırmaqdır. Türkiyə kəşfiyyatının həm ABŞ, həm də İran tərəfi ilə olan etibarlı əlaqələri bu kritik prosesdə Ankaraya mühüm vasitəçilik üstünlüyü qazandırır. Hazırda MİT-in digər ölkələrlə apardığı intensiv diplomatiya trafikinin atəşkəsin davamlılığı üçün həlledici olacağı gözlənilir.